गत जेठ ७ गते थाहाखबरले ‘रातभर शवसँगै सुत्छन् कोरोना संक्रमित’ शीर्षकमा समाचार प्रकाशन गरेपछि अस्पताल प्रशासन शव व्यवस्थापन गर्न सक्रिय बनेको थियो। राति ९ बजेपछि संक्रमितको मृत्यु भए नेपाली सेनाको शव व्यवस्थापन टोली शव व्यवस्थापन गर्न नआउने भन्दै अस्पतालले शवलाई रातभरि उपचाररत वार्डमै राख्ने गरेको थियो। जसले  गर्दा अन्य संक्रमितको मनोबलमा असर परेको समाचार थाहाखबरमा आएपछि अस्पतालले शुक्रबारदेखि शव राख्ने छुट्टै कक्षको व्यवस्था गरेको छ।

रातभर शवसँगै सुत्छन् कोरोना संक्रमित

अस्पतालका अध्यक्ष राजेश प्रसाईंले शुक्रबार राति ९ः४५ मा मृत्यु भएका संक्रमितको शव आधा घण्टामै निकालेर शव व्यवस्थापन कक्षमा राखिएको बताए। उनले अस्पतालले शव राख्ने छुट्टै कोठा र तीनजना कर्मचारी नै शवको व्यवस्थापनका लागि छुट्याएको बताए। 

‘काम गर्दै जाँदा हामीले ती कुरामा त्यति ध्यान दिन सकेका थिएनौं,’ उनले भने, ‘तर, सञ्चारमाध्यममा समाचार प्रकाशन भएपछि हामीले अस्पतालका तीनजना कर्मचारीलाई कोरोना संक्रमितको मृत्यु भएको आधा घण्टाभित्र शवलाई निकालेर शव व्यवस्थापन कक्षमा राख्न जिम्मा दिएका छौं।’ कहिले काही नेपाली सेनाको शव व्यवस्थापन टोली आउन ढिला हुने गरेको भन्दै प्रसाईंले अहिले अस्पतालले दिउँसो मृत्यु भएकाहरुलाई पनि आफंैले निकालेर शव व्यवस्थापन कक्षमा राख्ने गरेको बताए। शवलाई धेरै समयसम्म उपचाररत वार्डमै राख्दा अन्य कोरोना संक्रमितको मनोबल गिर्ने र बेड पनि खाली नहुने समस्या हुने गरेको बताए।

उनले समाचार प्रकाशन भएपछि विभिन्न संघ सस्ंथाले अस्पतालले गर्न नसकेको खण्डमा शव व्यवस्थापन गर्ने भन्दै अस्पताललाई अनुरोध गरेको पनि बताए। अस्पतालले त्यस विषयमा पनि सम्बन्धित निकायसँग छलफल गरिरहेको उनको भनाइ छ।