यसअघि बिहीबार पेरिसडाँडामै बसेको सचिवालय बैठकले महाधिवेशनको मिति र स्थानका बारेमा निर्णय गर्दै अनुमोदनका लागि पोलिट्ब्युरो बैठकमा पेश गरेको थियो। सचिवालयको निर्णय पोलिटब्युरोले अनुमोदन गरेको हो।

विभिन्न माओवादी घटकहरुसँग एकतापछि बनाइएको माओवादी केन्द्रको १ हजार ४ सय ९९ सदस्यीय केन्द्रीय समितिलाई महाधिवेशन आयोजक समिति भनेको छ। पोलिट्ब्युरो बैठकमा आगामी महाधिवेशनबाट केन्द्रीय सदस्यको संख्या १ सय ९९ जना बनाउने माओवादीको तयारी छ।

के गर्छ महाधिवेशनले?

माओवादी केन्द्रको अन्तरिम विधान २०७३ मा 'आधारभूत वैचारिक राजनीतिक विषयमा समान धारणा बनेका पार्टीहरुको बीचमा एकता भएकोले एकता महाधिवेशन विशिष्ट अवस्थाको हुने' उल्लेख छ। 

विगतका समीक्षात्मक प्रतिवेदनमाथि छलफल गरी पारित गर्ने, पार्टीको वैचारिक र राजनीतिक कार्यदिशा, नीति कार्यक्रम लगायतका राजनीतिक दस्तावेज पारित गर्ने, पार्टीको विधान निर्माण गर्ने र केन्द्रीय कार्यसमिति गठन गर्ने महाधिवेशनका मुख्य काम हुन्। 

महाधिवेशन अघि माओवादी रणनीति

प्रवक्ता पम्फा भुषाका अनुसार महाधिवेशनअघि माओवादीले सबै तहमा पार्टी एकता सम्पन्न गर्नेछ। विभाजित माओवादी घटकबीच केन्द्रमा एकता भए पनि स्थानीयस्तर र जनवर्गीय संगठनहरुमा एकताले पूर्णता पाएको छैन।

‘साउन अन्तिमसम्म सबै तहमा पार्टी एकता गर्छौँ र पुस २३ देखि २८ गतेसम्म राष्ट्रिय महाधिवेशन गर्छौँ’, बैठकपछि प्रवक्ता भुषालले भनिन्।

माओवादीले बाढी पहिरो नियन्त्रणका लागि युद्धस्तरमा काम गर्न पार्टी परिचालन गर्ने निर्णय गरेको छ।

यस्तै राष्ट्रिय सहमतिको सरकार गठनका लागि राजनीतिक दलहरुसँग छलफल अगाडि बढाउने निर्णय माओवादीले गरेको छ। ‘राष्ट्रिय सहमतिको सरकार गठनका लागि हामी गम्भीर बहस थाल्छौँ’, उनले भनिन्।

यस्तै सरकारको नीति तथा कार्यक्रममा छुटेका विषय समावेश गर्न पहल गर्ने र त्यसपछि पास गर्ने माओवादी केन्द्रले निर्णय गरेको छ।