समाज

सर्लाहीमा बागमतीले बाँध बगायो, बस्तीमा जोखिम बढ्यो

असार २७, २०७७

    सर्लाही : लगातार वर्षाका कारण सर्लाही र रौतहटको सिमाना भएर बग्ने बागमतीमा आएको बढीले बरहथवा नगरपालिका–१ हजरिया खर्सालघाटमा बाँध भत्काएको छ। साथै बाढीले खेत कटान गर्न थालेपछि स्थानीयवासी चिन्तित भएका छन्। 

    नगरपालिकाले १५ लाख रुपैयाँ लागतमा बनाएको डाइभर्सन तीन दिनअघि नै बगाएको हो। मेयरले आफ्ना कार्यकर्ता पाल्न कमजोर डाइभर्सन बनाएकाले बाढीले बगाएको स्थानीयको आरोप छ। बजेट सकाउने बहानामा हतारमा कमजोर संरचना बनाउँदा बाढीको एकै झट्काले बगाएको बरहथवा नगरपालिका १ का बेनीकुमार रायमाझीले बताए।  

    त्यस्तै प्रदेशसभा सदस्य वीरेन्द्र सिंहको निर्वाचन क्षेत्र विकास कोषको २५ लाख रुपैयाँबाट नदी नियन्त्रण गर्न १२ सय मिटर बाँध बनाइएको थियो। उक्त बाँध बाढीले बगाएर सय मिटर मात्र बाँकी रहेको छ। त्यस्तै बरहथवा नगरपालिकाको १५ लाख रुपैयाँमा डाइभर्सन र नदी नियन्त्रण कार्यालय परवानीपुर बाराको तर्फबाट केही रकम खर्च गरी तारजाली कस्ने काम भएको थियो।

    शनिबार बिहानसम्म ती सबै संरचना नदीमा बाढीले बगाएर उखु, धान र मकै बाली लगाएको खेतीयोग्य जमिन पनि कटान गरेको बरहथवा नगरपालिका–२ का स्थानीय जोखु सहनीले जानकारी दिए। 

    उनका अनुसार नदीमा पानीको बहाव बढ्दै जाँदा बरहथवा नगरपालिकाको वडा नं. १, ३, ४, १४ र १५ का बस्तीहरु समेत जोखिममा परेका छन्। नदीले तीव्र रुपमा कटान गरिरहे पनि जनप्रतिनिधिहरुले चासो नदिएको भन्दै स्थानीय किसानहरु आक्रोशित बनेका छन्। स्थानीयले यसबारे जानकारी गराउन बरहथवा नगरपालिकाका मेयर देवानन्द महतो, प्रमुख प्रसाशकीय अधिकृत खीमबहादुर भुजेललाइ दसौं पटक फोन गर्दा पनि उनीहरुले फुर्सद नभएको बताएका वडा १ का अध्यक्ष रत्नबहादुर गिरीले बताए। 

    खर्सालघाट क्षेत्रमा बर्सेनि यस्तो समस्या आउने गरेको बताए स्थानीय बताउँछन्। गत वर्ष हजरिया क्षेत्रमा बागमतीमा आएको बाढीले किसानका सयौं बिगाहा जमिन कटान भएको थियो। वर्षा बढेसँगै सर्लाहीमा पानीको उचित निकास नहुनाले होचा भागहरु डुबानमा पर्ने गरेका छन्। हरेक वर्ष डुबानको चपेटामा पर्ने सदरमुकाम मलङ्गवास्थित भाडसर क्षेत्रमा यो वर्ष पनि डुबान भएको छ। 

    वर्षौंदेखि जीर्ण रहेका जिल्लाको पूर्व–पश्चिम हुलाकी राजमार्गसहित भित्री ग्रामीण सडकहरु लगातारको वर्षाले हिलाम्मे र जलमग्न भएका छन्। सर्लाहीका प्रमुख जिल्ला अधिकारी मोहनबहादुर जिसीले पानीको निकास नरहेका र खेतपाती हुने ठूला फाँटहरुमा पानी जमेको भए पनि ठूलो किसिमको कटान तथा डुबानको समस्या नरहेको बताए।

    जिल्लामा बाग्मती लखन्देही, फूलजोर, कालिन्जोर, मनुस्मारा, सफाहा, बाँके नदीमा बाँध नहुँदा बर्सेनि सयौं बिगाहा खेतीयोग्य जमिन कटान हुने गरेको छ।

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
सुमार्गी बी कम्प्लेक्स
बबरमहल- ११, काठमाडौं, नेपाल

इमेलः
समाचार विभाग: इमेल-thahakhabar16@gmail.com
फोन : ९७७-१- ४२६१९४१
बिज्ञापनः फोन- ९७७-१-४२६३४५४
९८५१०७६३३६(सञ्जय नेपाल)
इमेल: mkt.thahakhabar@gmail.com

हाम्रो बारेमा

प्रधान सम्पादक: तीर्थ कोइराला
सूचना विभाग दर्ता नं.: ७७८/२०७४-७५

[विस्तृत]