एजेन्सी : अस्ट्रेलियाको तास्मानिया टापुमा अलपत्र परेका करिब ४७० ह्वेलमध्ये ३ सय ८० को मृत्यु भएको अधिकारीहरूले बताएका छन्।
अस्ट्रेलियामा अलपत्र परेर यति ठूलो सङ्ख्यामा ह्वेलहरूको मृत्यु भएको पछिल्ला केही दशकयता यो नै हुनसक्ने बताइएको छ। ती ह्वेलहरू कसरी तटीय क्षेत्रमा अलपत्र परे हालसम्म पत्ता लागेको छैन। ह्वेलको यो प्रजाति तटीय क्षेत्रमा पुगेर अड्किने सम्भावना बढी हुने बताइन्छ।
ह्वेलविज्ञहरूले गत सोमबार तस्मानिया क्षेत्रमा अलपत्र परेका ह्वेल सम्भवत अन्टार्कटिका जाने क्रममा बाटो बिराएर पानीको सतह कम भएको तटीय क्षेत्रमा फसेका हुनसक्ने बताएका छन्।
उद्धार प्रयासका बावजुद पनि अनुकुल वातावरण नपाउँदा तीन दिन भित्रमा यति धेरै सङ्ख्यामा ह्वेलको मृत्यु भएको छ। बुधबारसम्म उद्धारकर्ताहरूले ५० वटा ह्वेल बचाउन सफल भएका छन् भने थप ३० लाई बचाउन उनीहरू लागि परेका छन्।
तास्मानियाका अधिकारीहरूले ‘प्राणी जीवित रहेसम्म’ उद्धार कार्य जारी रहने बताएका छन्। 'पानीमा जीवितै रहँदासम्म हामीसँग आशावादी हुने अवस्था रहन्छ। तर समय बित्दै जाँदा उनीहरू झन् थकित हुनेछन्,', तास्मानियाको पार्क र वाईल्डलाईफ सर्भिसका क्षेत्रीय प्रबन्धक निक डेकाले बताए।
त्यसपहिले सन् २००९ मा करिब २०० पाइलट ह्वेल बलौटे पानीमा फसेको फेला परेका थिए।
तालिमप्राप्त ६० उद्धारकर्ताको एउटा टोलीले गोफनलगायतका विभिन्न उपकरणको सहयोगले मङ्गलबार बिहानदेखि केही ह्वेललाई कम पानी भएको ठाउँबाट गहिरो पानी भएको ठाउँतिर पुर्याउन सुरु गरेका थिए। तर शक्तिशाली छालका कारण उक्त कार्य चुनौतीपूर्ण भइरहेको उनीहरूको भनाइ छ।
तपाईंको ईमेल गोप्य राखिनेछ ।