काठमाडौं : सरकाले कोरोना रोकथाम, नियन्त्रण र उपचारमा खटिएका स्वास्थ्यकर्मीलाई कोभिड जोखिम भत्ता तत्काल उपलब्ध गराउन अस्पतालहरुलाई निर्देशन दिएको छ।
जोखिम भत्ता नपाएको भन्दै लामो समयदेखि वीर अस्पतालसहित विभिन्न स्वास्थ्यसंस्थामा कार्यरत स्वास्थ्यकर्मी आन्दोलनमा उत्रिएका बेला मन्त्रालयले यस्तो विज्ञप्ति जारी गरेको हो।
स्वास्थ्य तथा जनसंख्या मन्त्रालयले असोज मसान्तसम्म स्वास्थ्यकर्मीलाई जोखिम भत्तास्वरुप ६६ करोड ८७ लाख ४५ हजार रूपैयाँ रकम निकासा भइसकेको र कात्तिकको रकम भुक्तानी क्रममा रहेको जानकारी दिँदै उक्त निर्देशन दिएको हो।
आज मन्त्रालयमा बसेको सचिवस्तरको निर्णयअनुसार भत्ता उपलब्ध गराउन निर्देशन दिइएको बताइएको छ। मन्त्रालयका सहप्रवक्ता डा समीरकुमार अधिकारीले आज सूचना जारी गर्दै कोरोना महामारीमा खटिने सबै कर्मचारीलाई यथाशीघ्र जोखिम भत्ता उपलब्ध गराउन भनेका छन्।
यस्तै मन्त्रालयले कोरोना परीक्षण र उपचारमा खटिएका स्वास्थ्यकर्मीको जोखिम भत्ता नियमित रुपमा निकासा हुने भन्दै अलमलमा नपर्न सरोकारवालाई आग्रह गरेको छ। जोखिम भत्ता नपाएको भन्दै वीर अस्पतालसहित विभिन्न स्वास्थ्य संस्थामा कार्यरत स्वास्थ्यकर्मी आन्दोलनमा उत्रिएका बेला मन्त्रालयले यस्तो आग्रह गरेको हो।
तपाईंको ईमेल गोप्य राखिनेछ ।