कञ्चनपुर पुगेर बीनाले भनिन् :विपक्षी गुण्डागर्दीको शैलीमा उत्रियो

कञ्चनपुर:  खानेपानी मन्त्री बीना मगरले विकासको काममा कुनैपनि अवरोध स्वीकार्य नहुने बताएकी छन्। कञ्चनपुरस्थित बेलौरी नगरपालिकाको मंगलबार चौथो नगरसभाको उद्घाटन गर्दै खानेपानी मन्त्री मगरले विकासको काममा कहीँ कतैबाट अवरोध आए सैह्‍य नहुने बताएकी हुन्। उनले जथाभावी विरोध गरेर भन्दा पनि विकासको काममा साथ दिन प्रतिपक्षी दललाई आग्रह गरिन्।

 ‘विपक्षी दलका साथीहरुबाट गुण्डागर्दी शैलीमा हाकिमहरुलाई धम्क्याउने, थर्काउने जस्ता काम भइरहेको छ। प्रतिपक्षी दलले यो सब बन्द गरोस्।’ उनले भनिन्, ‘कञ्चनपुर क्षेत्र नम्बर १ को विकासका लागि अवरोध कसैले सृजना गर्छ भने त्यो सह्य हुँदैन। कञ्चनपुर क्षेत्र नम्बर १ लाई नमुना क्षेत्रको रुपमा  विकास गरेर देखाउँछौ। सक्नुहुन्छ भने साथ दिनुस होइन भने अवरोध गर्न बन्द गर्नुस्।’ विकासको कार्यमा अवरोध पु-याउनेहरुसँग कडा प्रतिकार गरेर अघि बढिने उनको भनाइ छ। 
उनले कञ्चनपुरमा भन्सार नाका खोल्ने, बन्दा तालको विकास गर्ने, सांस्कृतिक सम्पदाको संरक्षण गर्ने र सडक विस्तार गर्ने लगायतका कामहरु अघि बढिरहेको बताइन्।

नेपाल भारत सीमा समस्या समाधान गर्नेदेखि कञ्चनपुर निर्वाचन क्षेत्र नं. १ लाई नमुना शहरका रुपमा विकास गर्ने लक्ष्य रहेको मन्त्री मगरले बताइन्। नगर सभामा नगर प्रमुख पोतिलाल चौधरीले आर्थिक वर्ष २०७६/७७ को लागि ६० करोड ८५ लाख ९४ हजार बराबरको बजेट प्रस्तुत गर्नुभएको थियो।