काठमाडाैं : सरकारीस्तरबाट प्रदान गरिने देशकै सर्वाधिक राशिको पृथ्वी प्रज्ञा-पुरस्कार वाङ्मय शताब्दी पुरुष सत्यमोहन जोशीलाई दिइएको छ।
नेपाल प्रज्ञा प्रतिष्ठानले चार वर्षमा दिने पुरस्कारको राशि चार लाख नगदसहित दोसल्ला र सम्मानपत्र छ। राष्ट्रपति निवासमा सोमबार आयोजित कार्यक्रममा राष्ट्रपति विद्यादेवी भण्डारीले शताब्दी पुरुष जोशीलाई पुरस्कार प्रदान गरिन्। यसैगरी नेपाल प्रज्ञा सामाजिक शास्त्र-संस्कृति-दर्शन पुरस्कार प्रा डा त्रिरत्ननारायण मानन्धरलाई प्रदान गरियो। प्रत्येक दुई वर्षमा प्रदान गरिने सो पुरस्कारको राशि एक लाखसहित दोसल्ला र सम्मानपत्र छ।
नेपाल प्रज्ञा भाषा पुरस्कार प्रा डा टंकप्रसाद न्यौपानेलाई प्रदान गरियो। प्रत्येक दुई वर्षमा दिइने उक्त पुरस्कारको राशि एक लाख, दोसल्ला र सम्मानपत्र छ।
नेपाल प्रज्ञा नेपाली साहित्य पुरस्कार ९२०७५० मदन रेग्मी, नेपाल प्रज्ञा नेपाली साहित्य पुरस्कार ९२०७६० भागीरथी श्रेष्ठ, नेपाल प्रज्ञा मातृभाषा साहित्य पुरस्कार ९२०७५० पहाडी र हिमाली क्षेत्रमा बोलिने मातृभाषा साहित्यका लागि अमर तुम्याहाङ, नेपाल प्रज्ञा मातृभाषासाहित्य पुरस्कार ९२०७५० तराई-मधेशमा बोलिने मातृभाषा साहित्यका लागि अयोध्यानाथ चौधरीलाई प्रदान गरिएको छ। त्यसैगरी नेपाल प्रज्ञा मातृभाषा साहित्य पुरस्कार ९२०७६० पहाडी र हिमाली क्षेत्रमा बोलिने मातृभाषा साहित्यका लागि अमृत योञ्जन तामाङ तथा नेपाल प्रज्ञा मातृभाषा साहित्य पुरस्कार ९२०७६० तराई-मधेशमा बोलिने मातृभाषा साहित्यका लागि अशोक थारुलाई प्रदान गरिएको थियो।
उक्त पाँचवटै पुरस्कारको राशि एक लाख नगद, दोसल्ला र सम्मानपत्र छ। राष्ट्रपति भण्डारीले राष्ट्रिय कविता महोत्सव २०७६ मा विजयी कविलाई पनि पुरस्कृत गर्नुभयो । महोत्सवमा पहिलो स्थान हासिल गर्नुहुने धादिङका हेम प्रभासलाई ३५ हजार, दोस्रो स्थान हासिल गर्ने डोटीका सुभाषचन्द्र भण्डारीलाई २५ हजार, तेस्रो स्थान हासिल गर्नु हुने लमजुङका प्रज्वल अधिकारी, सोलुखुम्बुकी शान्ति शर्मा र काठमाडौँका प्रकाश बस्नेतलाई २० हजार प्रदान गरिएको थियो।
कार्यक्रमलाई सम्बोधन गर्दै राष्ट्रपति भण्डारीले वाङ्मय क्षेत्रको विकासका लागि सम्मानले सहयोग गर्ने बताइन्। प्रकृति र संस्कृतिसँग एकाकार गरी साहित्य सिर्जना गरेर राष्ट्रियतालाई अभिवृद्धि गर्न सकिने उनले उल्लेख गरिन्।
'राजनीतिक परिवर्तनलाई कला र साहित्यले ऊर्जा प्रदान गर्नुपर्छ। प्राचीन संस्कृति बोकेको स्वाधीन मुलुकमा सुदृढ सहिष्णुता छ। त्यसलाई कायम राख्न साहित्य क्षेत्रले योगदान गर्नुपर्छ', उनले भनिन्। संस्कृति, पर्यटन तथा नागरिक उड्ययनमन्त्री योगेश भट्टराईले पूर्वीय सभ्यताले एकताको सन्देश दिएकाले अनेकौँ अप्ठ्याराबाट मुलुक जोगिँदै आएको बताए।
एक सय २३ भाषा, अनेकौं धर्म संस्कृति भएका नेपाली राष्ट्रियताबाट संगठित भएका उनको भनाइ थियो। प्रतिष्ठानका कुलपति गंगाप्रसाद उप्रेतीले यसै साताभित्र महाकवि लक्ष्मीप्रसाद देवकोटाको निवासलाई संग्रहालयका रुपमा स्थापित गर्ने अभियान शुरु हुने जानकारी दिए।
कार्यक्रममा प्रतिष्ठानका उपकुलपति जगमान गुरुङ, सदस्य सचिव जगतप्रसाद उपाध्याय, सदस्य हेमनाथ पौडेललगायतले प्रतिष्ठानबाट प्रदान गरिने पुरस्कारका बारेमा जानकारी गराए।
तपाईंको ईमेल गोप्य राखिनेछ ।