जिल्ला अस्पतालले पनि उपचार गर्ने
जिल्ला अस्पतालले पनि उपचार गर्ने
काठमाडौं : सरकारले कोरोना भाइरससँग सम्बन्धित बिरामीको उपचारका लागि विभिन्न अस्पताललाई तोकेको छ। स्वास्थ्य मन्त्रालयले विशेष, हब अस्पताल र जिल्ला अस्पतालमा कोरोनाको उपचार गरिने जानकारी दिएको हो।
स्वास्थ्य मन्त्रालयका अनुसार काठमाडौं उपत्यका भित्र ६ वटा अस्पतालमा कोरोना भाइरसबाट संक्रमितको उपचार हुनेछ। शुक्रराज ट्रपिकल तथा सरुवा रोग अस्पताल, पाटन अस्पताल, सशस्त्र प्रहरी अस्पताल, वीर अस्पताल, आयुर्वेद रिसर्च सेन्टर र सैनिक अस्पतालले विशेष अस्पतालका कोरोनाका बिरामीको उपचार गर्नेछन्।
स्वास्थ्य मन्त्रालयले प्रदेशतर्फ पनि कोरोनाका बिरामीको उपचारका लागि अस्पताल तोकेको छ। मन्त्रालयका अनुसार प्रदेश १ मा झापास्थित मेची अस्पताल र उदयपुर अस्पताल, प्रदेश २ मा जनकपुर र बारा अस्पताल, बागमती प्रदेशमा भक्तपुर र सिन्धुली अस्पताल, गण्डकी प्रदेशमा धौलागिरी र गोरखा अस्पताले विशेष अस्पतालका रुपमा कोरोनाका बिरामीको उपचार गर्नेछन्।
प्रदेश ५ मा लुम्बिनी र गुल्मीको तम्घास अस्पताल, कर्णाली प्रदेशमा सुर्खेत र दैलेख अस्पतालमा कोरोनाका बिरामीको उपचार हुनेछ। सुदूरपश्चिम प्रदेशमा सेती र महाकाली अस्पतालले कोरोनाका बिरामीको उपचार विशेष अस्पतालका रुपमा गर्ने भएका छन्।
सरकारले यी बाहेक सबै प्रदेशमा हब अस्पताल पनि तोकेको छ। हव अस्तालका रुपमा तोकिएका अस्पताललाई सरकारले यसअघि नै १०/१० लाख रुपैयाँ निकासा गरिसकेको छ। हव अस्पतालका लागि डाक्टरसहितका स्वास्थ्यकर्मी पनि पठाइएको छ। मन्त्रालयका अनुसार सबै जिल्ला अस्पतालमा पनि कोरोनाका बिरामीको उपचार हुने छ।
तपाईंको ईमेल गोप्य राखिनेछ ।