नेपाल कम्युनिस्ट पार्टीका महासचिव विप्लव, नेपाल कम्युनिस्ट पार्टी (क्रान्तिकारी माओवादी) मोहन वैद्य किरण, नेपाल कम्युनिस्ट पार्टीका ऋषिराम कट्टेल र वैज्ञानिक समाजवादी कम्युनिस्ट संयोजक आहुतिद्वारा हस्ताक्षरित विज्ञप्तिमा संविधानसभाले निर्माण गरेको संविधानले दलाल तथा प्रतिक्रियावादी संसदीय व्यवस्थाको स्थापना गरेसँगै नेपाली जनता र राष्ट्रमाथि नयाँ तरिकाबाट एकपछि अर्को तीव्र शोषण, दमन र उत्पीडन गर्दै आएको बताएका हुन्। 

कथित नयाँ संविधानअनुसार भएको चुनावबाट खड्गप्रसाद ओलीको नेतृत्वमा बनेको सरकारले राष्ट्रिय स्वाधीनता, जनतन्त्र र जनजीविकामाथि झनै सङ्कट थोपारेको उनीहरुको आरोप छ। 

‘वर्तमान सत्ता, व्यवस्था र सरकारले गर्दै आएका जनघात, राष्ट्रघात र चरम भ्रष्टाचारी कदमहरूको हामीले विरोध र प्रतिवाद गर्दै आएका छौँ। त्यही क्रममा संसदीय राजनीतिले मान्दै आएको दुईतिहाइ बहुमत रहेको भनिएको कम्युनिस्टको खोल ओढेको केपी सरकारले पुस ५ गते संसद् विघटन गरेको छ’ विज्ञप्तीमा भनिएको छ, ‘पछिल्ला घटनाहरूप्रति हामी तपसिलका पार्टीहरूको गम्भीर ध्यानाकर्षण भएको छ।’ 

वर्तमान दलाल तथा प्रतिक्रिया वादी संसदीय व्यवस्था र नेपाली श्रमजीवी जनता बीचको अन्तरविरोध चर्किँदै गएको बताएका छन्। ‘दलाल तथा प्रतिक्रिया वादी पूँजीवादका विभिन्न गुटहरूका बीचमा पनि अन्तरविरोध चर्कंदै गएको छ। दलाल तथा प्रतिक्रिया वादी सत्ता, व्यवस्था र सरकारमा आएको गम्भीर सङ्कटलाई फाँसिवादी तरिकाले हल गर्ने दुष्प्रयास स्वरूप तथा वैदेशिक शक्तिको आड, भरोसा र इसारामा केपी सरकारले संसद् विघटन गरेको हो भन्ने हाम्रो ठम्याइ रहेको छ’ विज्ञप्तीमा भनिएको छ। 

प्रधानमन्त्री ओली सरकारको निरङ्कुशता, फाँसिवाद र दलाल तथा प्रतिक्रियावादी राज्यसत्ताका विरुद्ध अग्रगामी राजनीतिक विकासको ऐतिहासिक पहलकदमीका निम्ति हामी ४ पार्टीका बीचमा रणनीतिक संयुक्त मोर्चा निर्माण गर्ने सहमति भएको बताएका छन्। यसको अवधारणा, संरचना र अग्रगामी कार्यक्रम शीघ्र घोषणा उल्लेख गरेका छन्।