नेकपाको किचलोको अचानोमा संसद : गगन थापा

काठमाडौं : प्रमुख प्रतिपक्षी दल नेपाली कांग्रेसका सांसद गगन कुमार थापाले नेकपाको आन्तरिक किचलोले संसदमा प्रभाव पारेको आरोप लगाएका छन्। आज राष्ट्रपति बाट सरकारको सिफारिसमा चालू संसद अधिवेशन अन्त्य भएसँगै थापाले नेकपाको किचलोको अचानोमा संसद भएको बताएका हुन। 

‘संघीय संसदको चालु अधिवेशन अप्रत्यासित रुपमा अन्त्य विनाशकाले विपरीत बुद्धि,’ थापाले ट्वीटरमा लेखेका छन्, ‘संसदमा थुप्रै विधेयकहरु कार्यसूचीमा र प्रक्रियामा छन,कोभिड-१९ लगायत विभिन्न विषयमा प्रस्ताव दर्ता छन्। पार्टीभित्रको किचलोको अचानोमा संसद।’

 उनले संसदलाई छलेर अब कुनै पनि अध्यादेश नल्याउन पनि सरकारलाई आग्रह गरेका छन्। ‘संसदलाई छलेर अब कुनै पनि अध्यादेश ल्याउने दुष्प्रयास नहोस्,’ थापाले लेखेका छन्।   

राष्ट्रपति व्यक्ति होइन संस्था हो।पार्टी विवादमा राष्ट्रपति संलग्न हुनु/गराउनु आफ्नो जिम्मेवारीको दुरुपयोग गर्नु हो,संविधान र संस्थाको मर्यादाको खिलाफमा हो,गणतन्त्रकै अवमूल्यन हो।@PresidentofNP ज्यू,राष्ट्रपति संस्था पार्टीभन्दा धेरै उच्च हो भन्ने सम्झाइरहनु नपर्ला!

— Gagan Thapa (@thapagk) July 2, 2020