गोरखा : मौसम खराबीका कारण पर्वत जान उडेको नेपाली कांग्रेसका सभापति शेरबहादुर देउवा सवार हेलिकप्टर गोरखामा आकस्मिक अवतरण गरिएको छ ।
पर्वतको फलेवास नगरपालिका-३ शंखरपोखरीमा भएको एक कार्यक्रमलाई सम्बोधन गर्न काठमाण्डौँबाट हिँडेको देउवा सवार हेलिकप्टर गोरखाको पालुङटार नगरपालिका स्थित आँपपिपलमा अवतरण गरिएको हो।
उक्त हेलीकप्टर आँपपीपलमा करिब एक बजे अवतरण गरेको र मौसम सफा भएलगत्तै पुन: उडान हुने खबर पाएको जिल्ला प्रहरी कार्यालय गोरखाका एसपी सुरेन्द्र बहादुर गुरुङले जानकारी दिए।
उनी आज ११ बजे पर्वतमा शहीद तीवारी स्मृतिमा निर्माण गरिएको स्मृति भवन उद्घाटन गर्ने र श्रद्धाञ्जलि सभालाई सम्बोधन गरेर फर्किने गरी काठमाण्डौँबाट हिँडेका थिए। मौसम खराबीका कारण समयमा नै कार्यक्रमस्थलमा नपुग्ने भएपछि भवन उद्घाटन हुने या नहुने अन्योल रहेको छ।
शहीद तिवारी नेपाली कांग्रेस पर्वत क्षेत्र नं २ को क्षेत्रीय सभापति हुन्। उनको विसं २०६१ साल माघ १ गते माओवादी कार्यकर्ताले हत्या गरेका थिए।
तपाईंको ईमेल गोप्य राखिनेछ ।