काठमाडौं : सामाजिक अभियन्ता मित्रसेन दाहालको स्मृतिमा पाँच करोड रुपैयाँको अक्षय कोष घोषणा गरिएको छ। सामाजिक अभियानमा सक्रिय रहँदा नै हृदयाघातबाट मृत्यु भएका दाहालको १२ औँ पुन्य तिथिमा अक्षयकोष घोषणा गरिएको हो।
दाहालको गत फागुन ७ गते ५८ वर्षको उमेरमा निधन भएको थियो। उनको बहुआयामिक व्यक्तित्वलाई चिरस्थायी बनाइराख्न र मैत्री सेवा आश्रमसहित अन्य विविध सामाजिक कार्यलाई सहयोग पुर्याउन कोषको रकमबाट आएको आम्दानी खर्चिने कोष सञ्चालक समितिले जनाएको छ।
अक्षय कोष सञ्चालक समितिले कोषको नाम ‘मित्रसेन दाहाल ज्येष्ठ नागरिक सेवा कोष’ राखेको छ। कोषमा पहिलो चरणमा परिवारका सदस्यसहित शुभचिन्तकले स्थापनाकै दिन करिब सवा ५५ लाख रुपैयाँको योगदान दिएका छन्। भाइ तथा जेपी प्रतिष्ठानका सञ्चालक हरि दाहालले ११ लाख ११ हजार १११ तथा मित्रसेन दाहालकी धर्मपत्नी शकुन्तलाले पाँच लाख ५५ हजार ५५५ रूपैँया योगदान गरेका छन्। अन्य सहयोगीको योगदानबाट २०७७ फागुन १८ गते कोषमा ५५ लाख २१ हजार ८२१ जम्मा भएको छ।
२०६९ सालमा नेपाल सरकारको नीति तथा कार्यक्रममा नै समेटेर पाँच विकास क्षेत्रमा ज्येष्ठ नागरिक ग्राम निर्माण गर्ने घोषणा गर्दा तात्कालीन मध्यामाञ्चल विकास क्षेत्रका लागि दाहालले २०६६ सालदेखि नै सुरु गरेका काठमाडौँको लप्सेफेदीमा रहेको मैत्री सेवाश्रम छनोट भएको थियो। सरकारको घोषणाअनुसार केही सहयोग गरे पनि करिब एक अर्ब रुपैयाँ बराबरको परियोजना दाहाल आफैँ विभिन्न क्षेत्रको सहयोगमा निर्माण गरेका थिए।
काठमाडौँको लप्सेफेदीदेखि दाहालले निर्माण गरेको मैत्री सेवाश्रम ‘सामाजिक कार्य’मा अनुसन्धान तथा अध्ययनमा रुचि राख्नेहरू तथा आफैँ समाजसेवामा सहयोग हुनेहरूका लागि गन्तव्य बनेको छ।
तपाईंको ईमेल गोप्य राखिनेछ ।