लहान : आर्थिक अनियमितमा भएको भन्दै वडाध्यक्ष तथा कार्यपालिका सदस्यले सिरहाको कल्याणपुर नगरपालिकामा तालाबन्दी गरेका छन्।
नगरपालिकाका कार्यबाहक नगरप्रमुख र प्रमुख प्रशासकीय अधिकृतको मिलेमतोमा व्यापक अनियमिता भएको भन्दै वडाध्यक्ष तथा कार्यपालिका सदस्यहरुले नगरपालिकामा तालाबन्दी गरेका हुन्।
नगरसभाले पारित गरेको योजनासमेत कार्यपालिका बैठकबिनै मनोमानी तरिकाले परिवर्तन गरी कार्यबाहक नगरप्रमुख रोहिणीकुमारी यादव र प्रमुख प्रशासकीय अधिकृत जयप्रसाद दासको मिलेमतोमा व्यापक अनियमितता भएकाले तालाबन्दी गरिएको वडाध्यक्षले बताएका छन्।
कल्याणपुर नगरपालिकाका ९ जना वडाध्यक्ष तथा आठ जना कार्यपालिका सदस्यले सामूहिक रुपमा ११ सुत्रिय माग राख्दै नगरपालिकामा तालाबन्दी गरेको वडा–५ का अध्यक्ष दीपेन्द्र यादवले जानकारी दिए।
चालू आर्थिक वर्षमा हालसम्म सामाजिक सुरक्षा, बाल पोषण भत्ता लगायतको भुक्तानी गर्न नसकेकाले आफूलाई स्थानीयवासीले पटकपटक वडा कार्यालयमा गई विभिन्न किसिमको आरोप लगाउने गरेको र आफूहरूलाई वडा कार्यालय सञ्चालन गर्न समेत कठिनाई भइरहेकाले बाध्य भएर तालाबन्दी गर्नु परेको कल्याणपुर नगरपालिका–१ वडाध्यक्ष जयराम कामतीले बताए।
कार्यबाहक नगरप्रमुख यादव र प्रमुख प्रशासकीय अधिकृत दासको मिलोमतोमा कार्यपालिकालाई जानकारी नदिई विभिन्न योजना कमिसनको खेलमा आसेपासेलाई जिम्मा दिई आफूखुशी सञ्चालन गरेको वडा–५ का अध्यक्ष यादवको आरोप छ।
तपाईंको ईमेल गोप्य राखिनेछ ।