काठमाडौं : स्वास्थ्य तथा जनसंख्या मन्त्रालयले मन्त्रालयको सिफारिसबिना अक्सिजन ग्यासको सिलिन्डर बिक्री वितरण नगर्न अनुरोध गरेको छ। मन्त्रालयले कोभिड–१९ का संक्रमितको उपचारमा अक्सिजन सिलिन्डरको अभाव हुन नदिनका लागि ग्यास उत्पादकलाई पत्र लेख्दै मन्त्रालयको सिफारिसबिना कुनै पनि सरकारी वा निजी अस्पताललाई अक्सिजन ग्यास सिलिन्डर बिक्री वितरण नगर्न अनुरोध गरेको हो।
मन्त्रालयको विपद् व्यवस्थापन एकाइ तथा स्वास्थ्य आपतकालीन कार्य सञ्चालन केन्द्रका महाशाखा प्रमुख डा. गुणराज लोहनीले सूचना जारी गर्दै कोभिड–१९ को दोस्रो लहरका कारणले धेरै संक्रमितलाई अक्सिजन आवश्यक पर्ने भएकाले ग्यास उत्पादकलाई मन्त्रालयको सिफारिसबिना अस्पताललाई ग्यासको सिलिन्डर बिक्री वितरण नगर्न अनुरोध गरेको हो।
‘कोभिड–१९ महामारीको दोस्रो लहरमा धेरै संक्रमितलाई अक्सिजनको आवश्यकता परिरहेको सन्र्दभमा अक्सिजन बिक्री वितरणलाई थप व्यवस्थित गर्न आवश्यक भएकाले नेपाल सरकार स्वास्थ्य तथा जनसंख्या मन्त्रालयको सिफारिसबिना कुनै पनि सरकारी, सामुदायिक तथा निजी अस्पताललाई ग्यास सिलिन्डर भरी बिक्री वितरण नगर्न हुन अनुरोध गरिन्छ,’ जारी सूचनामा भनिएको छ।
मन्त्रालयले कान्तिपुर अक्सिजन प्रालि, सगरमाथा अक्सिजन प्रालि, अक्सिटेक अक्सिजन प्रालि, नवज्योति अक्सिजन प्रालि, हाम्रो अक्सिजन प्रालि, सोपान फर्मास्युटिकल्स प्रालि, हिमाल अक्सिजन प्रालि, सीता अक्सिजन प्रालि, शंकर अक्सिजन प्रालि लगायत सबै अक्सिजन ग्यास आपूर्तिकर्तालाई पत्र लेख्दै मन्त्रालयको सिफारिसमा मात्र अक्सिजन बिक्री गर्न अनुरोध गरेको छ। सूचनामा मन्त्रालयको सिफारिसबिना बिक्री वितरण गरिएको पाइएमा कारवाही गर्ने समेत जनाइएको छ।
सरकारले अक्सिजनको अभाव हुन नदिनका लागि चीन सरकारबाट २० हजार खाली अक्सिजन सिलिन्डर ल्याउन थालेको छ। पहिलो चरणमा ४०० खाली अक्सिजन सिलिन्डर ल्याउन यही वैशाख २७ गते नेपाल वायुसेवा निगमको वाइडबडी जहाज चीन जाँदैछ। नेपालमा अहिले अक्सिजन सिलिन्डरको संख्या छ हजार २८८ रहेको छ। दैनिक एक हजार ४११.५ लिटर खपत भइरहेको जनाइएको छ।
तपाईंको ईमेल गोप्य राखिनेछ ।