इजरायली प्रधानमन्त्री नाफ्ताली बेनेटले ओमानी तटमा रहेको इजरायलद्वारा सञ्चालित तेल ट्याङ्करमा दुई जनाको ज्यान जानेगरी भएको हमलामा ईरानको हात रहेको बताएका छन्।
उनले ईरान इजरायलको शत्रु रहेको आरोप लगाउँदै उक्त घटनामा ईरानको हात रहेको प्रमाण आफूहरूसँग रहेको दाबी पनि गरेका छन्। उनको यो भनाइपछि अमेरिका र बेलायतले पनि ईरानको हात रहेको हुनसक्ने वक्तव्य दिएका छन्।
बेलायत र अमेरिकाले ईरानको हात रहेको आफूहरूलाई पनि विश्वास लागेको बताएका थिए। अमेरिका र बेलायतले यस घटना अन्तर्राष्ट्रिय कानूनकोविपरीत रहेको पनि बताएका छन्।
यता ईरानले भने सो घटनामा आफ्नो संलग्नता अस्वीकार गरेको छ। इजरायलका प्रधानमन्त्री बेनेटले यसबारेमा चेतावनी दिँदै ईरानलाई कसरी जवाफ दिनुपर्छ भन्ने कुरा आफूलाई थाहा भएको भनेपछि यता ईरानले यस घटनामा आफ्नो हात नरहेको भनी स्पष्ट गरेको छ।
तेहरानले यसलाई आधारहीन आरोप भनेको छ। उक्त ट्याङ्करमा भएको हमला इजरायल र ईरानबीचको अघोषित रूपमा एक किसिमको तनाव बढाउने पछिल्लो घटनाका रूपमा आएको विदेशी समुदायले दाबी गरेका छन्।
गएको मार्चदेखि ईरान र इजरायलले सञ्चालन गर्दै आएका कैयौँ पानीजहाजमा आक्रमण भएको देखिएको छ।
पछिल्लो पटक भने इजरायलको स्वामित्वको एक कम्पनीले सञ्चालन गरिरहेको एमभी मर्सर स्ट्रिट नामक ट्याङ्करमा गत बिहीबार आक्रमण भएको थियो। ओमानी तटमा सो ट्याङ्करमाथि आक्रमण भएको थियो।
त्यस आक्रमणमा दुई जनाको ज्यान पनि गएको थियो। ज्यान जानेमा एक जना ब्रिटिश र एक जना रुमेनियाली नागरिक रहेका छन्। त्यस हमलामा अहिलेसम्म कसैले पनि जिम्मेवारी लिएको छैन।
तपाईंको ईमेल गोप्य राखिनेछ ।