|

कास्की : माछापुच्छ्रे गाउँपालिकाको अत्याधुनिक सुविधा सम्पन्न प्रशासनिक भवन निर्माणले तीव्रता पाएको छ। स्थानीय तह स्थापनाको पहिलो पाँच वर्षमा गाउँपालिकाको ‘सिँहदरबार’तयार हुने भएको छ।

पाँच  स्थानीय तह रहेको जिल्लामा माछापुच्छ्रे मात्र प्रशासनिक भवन निर्माण भइरहेको हो। कतै भवन निर्माणका लागि जमिन अभाव त कतै केन्द्रको विवाद टुंगो लाग्न नसक्दा स्थानीय तह गठन भएर जनप्रतिनिधि आएको पहिलो कार्यकालमा चार स्थानीय तहले प्रशासनीक भवन बनाउन सकेका छैनन्।

माछापुच्छ्रे गाउँपालिकाको केन्द्र वडा नम्बर ४ लाहाचोकस्थित सानोपाटन (साहुथर)मा १० रोपनी क्षेत्रफलको जमिनमा ६ करोड ६२ लाख ११ हजार ९०६ रुपैयाँ लागतमा बनाउँदै गरेको भवन अहिले निर्माणको अन्तिम चरणको पुगेको छ। हाल गाउँपालिकाको प्रशासनीक कार्य साविक गाविस कार्यालय भवनको मर्मत सम्भार गरेर सञ्चालन हुँदै आएको छ। प्रसासनिक भवनको स्ट्रक्चरको काम सकिएर अहिले रंगरोगन र वायरिङ सुरु गरिएको गाउँपालिकाका सबइन्जिनियर राजेन्द्र गौतमले जानकारी दिए। उनका अनुसार समग्रमा ८५ प्रतिशत काम सकिएको छ।

आगामी मंसिर महिनाभित्रमा सम्पूर्ण काम सकेर हस्तान्तरण गरिने योजना छ। उनले भने, ‘प्रसासनिक भवन निर्माण कार्य अन्तिम चरणमा पुगेको छ। भवनको कम्पाउण्डको केही भाग, पार्किङ र रंगरोगनबाहेक अन्य काम सकिएको छ।’

फनिसिङ भइरहेको छ। संरचनाहरु बनेर फिनिसिडको प्लास्टर सकिएको। २०७८ फागुन १६ सम्ममा सम्पन्न गर्ने गरी भवन निर्माणका लागि नयाँ बाटो/जिएस इन्जिनियरिङ जेभीसँग ठेक्का सम्झौता भएकामा निर्माण कम्पनीले तोकिएको मितिभन्दा तीन महिना अगावै सम्पन्न गर्ने गरी काम अघि बढाएको हो। विद्युतीय भर्‍याङ(लिफ्ट) सहित तीन तलाको भवनमा ३९ कोठा रहनेछन्। यसैगरी माथिल्लो तलामा २०० जना क्षमताको सभाहल हुनेछ।

गाउँपालिका उपाध्यक्ष कृष्णकुमारी दवाडीले आफूहरुको कार्यकालभित्रमा अत्याधुनिक भवनबाट सेवा प्रवाह हुने बताए। अन्य स्थानीय तहले भन्दा आफूहरुले प्रशासनिक भवन निर्माणलाई प्राथमिकतामा राखेकाले त्यो सम्भव भएको उनले बताए।

‘हालको भवनमा पर्याप्त ठाउँ नहुँदा कार्यालय व्यवस्थापन गरेर राम्रोसँग कुर्सी टेवल समेत राख्न सकिने अवस्था छैन‚’ उनले भने‚ ‘निर्धारित समयभित्रमानै सुविधासम्पन्न भवन बनाएर पालिकावासीलाई सहज सेवा दिन्छौँ।’

गाउँपालिकाले चालु वर्षमा प्रशासनिक भवनमा फर्निचर लगायत कार्यालयको व्यवस्थापनका लागि एक करोड ५० लाख रुपैयाँ बजेट विनियोजन गरेको उपाध्यक्ष दवाडीले जानकारी दिए। नयाँ भवन बनेपछि गाउँपालिकाको प्रशासनिक सहित कृषि, स्वास्थ्य, शिक्षा, सामाजिक विकास लगायतका विषयगत शाखा कार्यालयको सेवा पनि एकै थलोबाट प्रवाह हुने जनाइएको छ।

भवन भवन निर्माणका लागि जिल्ला समन्वय समिति कास्कीले मौज्दात कोषबाट दुई करोड ५० लाख र प्रदेश सरकारको ५० लाख रुपैयाँ लगानी गरेकामा बाँकी रकम गाउँपालिकाले लगानी गरेको छ। निर्माण कम्पनीका आधिकारिक प्रतिनिधि डम्बरराज ढकालले ढिलोमा मंसिर महिनाभित्रमा सबै काम सकेर गाउँपालिकालाई भवन हस्तान्तरण गरिने जानकारी दिए। लिफ्टका सामग्री भन्सार आइपुगेकाले दसैँ लगत्तै निर्माणस्थलमा ल्याइने जानकारी दिँदै उनले ‘फिनिसिङ’को कार्य जतिसक्दो चाँडो सम्पन्न गरिने बताए।

सम्वन्धित समाचार

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.