काठमाडौं : चीन सरकारले नेपाललाई २० लाख डोज कोरोनाविरुद्धको खोप दिने घोषणा गरेको छ।
परराष्ट्रमन्त्री नारायण खड्का र चिनियाँ विदेशमन्त्री वाङ यीबीच आज भएको टेलिफोन वार्तामा यीले उक्त घोषणा गरेका हुन्। वार्ताका क्रममा चिनियाँ विदेशमन्त्री यीले थप २० लाख डोज खोप अनुदान दिने घोषणा गरेको परराष्ट्र मन्त्रालयले प्रेस विज्ञप्ति जारी गरी जनाएको छ।
मन्त्रालयका अनुसार टेलिफोन कुराकानीमा खड्का र यीबीच दुई पक्षीय सम्बन्ध, कोभिड–१९ विरुद्धको खोपमा सहकार्य, व्यापार र विकासमा समन्वय र सीमा व्यवस्थापनका विषयमा छलफल भएको थियो।
कुराकानीका क्रममा तातोपानी र रसुवागढी नाकाबाट थप कन्टेनर ल्याउन दिने विषयमा पनि छलफल भएको बताइएको छ। यीले परराष्ट्रमन्त्री खड्कालाई चीन भ्रमणको निम्तो समेत दिएका छन्।
तपाईंको ईमेल गोप्य राखिनेछ ।