पर्वत : कास्की जिल्लामा कोरोना सङ्क्रमितको संख्या दैनिक उकालो लाग्दै गएपछि जिल्ला प्रशासन कार्यालयले विभिन्न सेवा र व्यवसायमा थप कडाइ गरेको छ।
कास्कीमा कोभिड संक्रमण दर ५० प्रतिशतभन्दा बढि भएकाले रोकथाम तथा नियन्त्रणका लागि सङ्घीय मन्त्रिपरिषद्ले गत पुस ३० मा गरेको निर्णय तथा जिल्ला कोभिड–१९ व्यवस्थापन केन्द्रको सोमबारको बैठकको सिफारिसको आधारमा कडाइ गरिएको हो।
प्रमुख जिल्ला अधिकारी जयनारायण आचार्यका अनुसार सिनेमा हल, पार्टी प्यालेस, डान्स बार, दोहोरी, नाच घर, क्लब, हेल्थ क्लब, जिम खाना, स्विमिङ पुल, फुटसल, पटके हाटबजार, स्पा सेन्टर, ब्युटी पार्लर र मानिसहरूको भिडभाड हुने स्थान तथा विद्यालय, विश्वविद्यालय, कलेज, ट्युसन सेन्टरसहित भौतिक उपस्थितिमा सञ्चालन हुने तालिम वा शैक्षिक क्रियाकलापहरूलाई माघ १५ गतेसम्म रोक लगाइएको छ।
यस्तै माघ मसान्तसम्म सबै प्रकारका आमसभा, जुलुस, सभा वा धेरै मानिस जम्मा हुने क्रियाकलाप तथा जिल्लामा रहेका मठ, मन्दिर, मस्जिद, गुम्बा, चर्चलगायत धार्मिक स्थलमा जनस्वास्थ्यका मापदण्ड पालना गरी नित्य पूजा, ध्यान र प्रार्थनाबाहेक अन्य क्रियाकलाप गर्न पनि रोक लगाइएको छ।
‘जिल्लाभित्रका सेवा प्रदायक निकायहरूले सेवा प्रवाह गर्दा सेवाग्राहीहरूले अनिवार्य रूपमा कोभिडविरुद्ध खोप लगाएको प्रमाण देखाउनुपर्छ। सेवा प्रदान गर्दा सकेसम्म खुल्ला स्थानबाट देखाउन आदेश दिएका छौँ,’ प्रजिअ आचार्यले भने, ‘सपिङ मल, डिपार्टमेन्टल स्टोर, सुपरमार्केट वा अन्य प्रकारका पसलमा एक पटकमा २५ जनाभन्दा बढी हुन नपाइने, अनावश्यक रूपमा कुनै पनि वस्तुहरू नछुनेलगायत निर्णय पनि गरिएको छ।’
माघ ६ गते सुरु हुन लागेको २० औँ आहा–रारा गोल्ड कपको सन्दर्भमा प्रशासनले रङ्गशालामा दर्शकसहित नगरी नहुने पूर्वनिर्धारित खेलकुदका कार्यक्रम गर्दा एक पटकमा कुल क्षमताको एक तिहाइ मात्र उपस्थित रहने गरी जनस्वास्थ्यका मापदण्ड पालना गरेर सञ्चालन गर्न भनिएको छ।
माघ ३ गतेपछि त्यस्ता खेलकुद कार्यक्रममा खोपको मात्रा पूरा गरेका व्यक्तिहरूलाई मात्र खोप कार्डको आधारमा रङ्गशाला प्रवेश गर्न दिने तर सकभर दर्शक नराखी खेलकुद कार्यक्रम सञ्चालन गर्न भनिएको छ।
धार्मिक वा सांस्कृतिक जात्रा, पर्व, विवाह, न्वारन, पास्नी, व्रतबन्ध, धार्मिक अनुष्ठान, मृत्यु संस्कारलगायत अत्यावश्यक परम्परागत धार्मिक तथा सांस्कृतिक क्रियाकलापहरू सञ्चालन गर्दा २५ जना भन्दा बढी नहुने गरी तोकिएका जनस्वास्थ्यका मापदण्डको पालना गरी परिवारमा मात्र सीमित भएर सञ्चालन गर्ने गराउने भनिएको छ।
सार्वजनिक यातायात सञ्चालन गर्दा सिट क्षमताभन्दा बढी यात्रु राख्न नपाइने, सवारीलाई दैनिक रूपमा संक्रमणमुक्त गरिएको हुनुपर्ने, सहचालकले मास्कसहित फेस–सिल्ड पनि लगाएको हुनुपर्ने, कास्की हुँदै अर्को जिल्लामा आउजाउ गर्ने लामो दूरीका सवारीहरूले बीचमा यात्रु चढाउन नपाउने भनिएको छ।
होटेल तथा रेष्टुराँको सन्दर्भमा कामदारले मास्क, फेस–सिल्ड र पन्जा लगाएको हुनुपर्ने, कुल क्षमताको आधाभन्दा बढी नहुने गरी ग्राहक बस्न पाउने, खोपको पूर्ण मात्रा पूरा गरेकाहरूलाई मात्र प्रवेश दिनुपर्ने, रेस्टुराँ सञ्चालन गर्दा बाजागाजा (लाइभ म्युजिक) पूर्ण रूपमा रोकी राति १० बजेसम्म मात्र सञ्चालन गर्न सकिने भनिएको छ।
कास्कीमा सोमबार मात्र १ सय ८६ जनामा संक्रमण पुष्टि भएको छ।
स्वास्थ्य निर्देशनालय गण्डकी प्रदेशका अनुसार कास्कीमा हाल सक्रिय संक्रमितको सङ्ख्या ८ सय ८० रहेको छ।
कास्कीमा यसअघिको कोरोना संक्रमणबाट ६ सय २७ जनाको मृत्यु भएको थियो।
तपाईंको ईमेल गोप्य राखिनेछ ।