धादिङ : धादिङको ससाहमा आज दिउँसो सवारी दुर्घटना हुँदा १ जनाको मृत्यु भएको छ भने १ जना घाइते भएका छन्। दुर्घटनामा परी मोटरसाइकल चालक नीलकण्ठ नगरपालिका वडा नं. ७ का २९ वर्षीय अर्जुन पोखरेलको मृत्यु भएको हो।
पोखरेलको उपचारको क्रममा धादिङ अस्पतालमा मृत्यु भएको जिल्ला प्रहरी कार्यालय धादिङले जनाएको छ। मृतक पोखरेल नीलकण्ठ ७ मा माओवादी केन्द्र तर्फका वडा सदस्य पदका उम्मेदवार समेत हुन्।
गम्भीर घाइते सोही नगरपालिका ३ का सन्तोष अधिकारीलाई धादिङ अस्पतालमा सामान्य उपचार पश्चात थप उपचारको लागि काठमाण्डौं ल्याइएको प्रहरीले जनाएको छ।
धादिङबेँसीबाट काठमाडौंतर्फ आउँदै गरेको बा ५ ख ७०७२ नम्बरको आइचर ट्रिपरले बागमती प्रदेश ०२–०३३ प ३३९४ नम्बरको मोटरसाइकललाई ठक्कर दिएको थियो।
तपाईंको ईमेल गोप्य राखिनेछ ।