काठमाडौं : चलचित्र सरी ममको ट्रेलर सार्वजनिक भएको छ।
सोमबार काठमाडौंमा एक कार्यक्रमबीच ट्रेलर सार्वजनिक गरिएको हो। १ मिनेट १९ सेकेण्डको ट्रेलरमा सामाजिक विषयवस्तुको उठान गरिएको छ।लागुऔषधविरुद्धको सन्देशसहित सामाजिक तथा पारिवारिक कथामा निर्माण भएको फिल्ममा प्रमुख कलाकार सरिता लामिछाने र सरोज खनालको अभिनय रहेको छ।
चलचित्रमा परिवारको सदस्य दुर्व्यसनमा परेपछि उत्पन्न हुने परिस्थिति र त्यसले सम्बन्धित किशोर र परिवारमा पार्ने प्रभाव समेटिएको छ। किशोरावस्था उमेरलक्षित चलचित्रको सार्वजनिक ट्रेलरले कुलतविरुद्धको सन्देश बोल्छ।
कार्यक्रममा बोल्दै नायिका सरिता लामिछानेले किशोरावस्था र युवापुस्ताका दर्शकलाई लक्षित गरेर निर्माण गरिएको भन्दै चलचित्र उत्कृष्ट रहेकाले दर्शकको मन जित्ने बताइन्। उनले फिल्मले सामाजिक कथावस्तुको उजागर गरेकाले लक्षित वर्गमा यसको प्रभाव पार्ने बताइन्। त्यस्तै कार्यक्रममा नायिका करिश्मा मानन्धरले फिल्म सरी ममले दर्शकको माया धेरै पाउनेमा विश्वस्त रहेको बताइन्।
नवीन बोगटीको निर्देशनमा बनेको फिल्ममा सरोज खनाल र सरिता लामिछाने, एलिस राई, प्रभात पल, प्रेविल कडेल, आरबी कटुवाल, बिहान श्रेष्ठ, युनिसा बजगाईं, रेजिना मगर, सरोज बखुरेल, लालमणि भण्डारीको अभिनय रहेको छ।
फिल्ममा दीर्घ गुरुङको छायाङ्कन र प्रीतम पाण्डेको सम्पादन छ। आयुष बुढाथोकी र सरोज पौडेलले लेखेको फिल्मको निर्मातामा खेमराज अधिकारी र रोजिता तामाङ पनि छन्।
तपाईंको ईमेल गोप्य राखिनेछ ।