काठमाडौं : पोखरामा क्रिकेटका राष्ट्रिय टिमका खेलाडी करण केसीलाई सम्मान गरिएको छ। शुक्रबार पोखरा महानगरपालिका-१३ ले एक कार्यक्रम आयोजना गरि उनलाई सम्मान गरेको हो।
वडाध्यक्ष किरण बरालले राष्ट्रिय टिमका खेलाडी केसीलाई सम्मान गरिएको उनले जानकारी दिए। उनका अनुसार केसीका हजुरआमा र आमालाई पनि सम्मान गरिएको छ।
‘केसी वडाबासी भएकाले वडाले सम्मान गरेको हो,’ उनले भने, ‘स्थानीय तहमा भएका यस्ता खेलाडीलाई सम्मान गर्दा अन्य खेलाडीलाई पनि प्रोत्साहन मिल्छ।’
सम्मान समारोहमा अध्यक्ष बरालले खेल क्षेत्रमा केसीको उज्जवल भविष्यको कामना पनि गरे। राष्ट्रलाई उनले पुर्याएको योगदान कदर गरी सम्मान गरिएको उनको भनाइ छ।
‘उनीजस्ता खेलाडीलाई सम्मान गर्न पाउनु हाम्रो लागि अहोभाग्य हो,’ उनले केसीलाई सम्मानित गरेपछि भने, ‘खेलाडीलाई गरिएको सम्मानले उनलाई थप हौसला मिल्ने आशा गरेका छौं, यस्ता कामले वडामा भएका अन्य खेलाडीलाई थप हौसला र प्रोत्साहन मिल्नेछ।’
सम्मानित भइसकेपछि करण केसीले सम्मान गर्ने जनप्रतिनिधिलाई धन्यवाद प्रकट गरे। ‘सम्मानले मेरो खेल जीवनमा थप ऊर्जा मिलेको छ,’ उनले भने,’ नेपाल र नेपाली क्रिकेटलाई माथि पुर्याउन हौसला प्राप्त भएको छ।’
तपाईंको ईमेल गोप्य राखिनेछ ।