काठमाडौँ : विश्व बैंकले नेपालको आर्थिक वृद्धिदर सुधार हुने प्रक्षेपण गरेको छ।
विश्व बैंकले सार्वजनिक गरेको अर्धवार्षिक प्रतिवेदनमा आयात प्रतिबन्ध हटेको, पर्यटनमा फर्कंदो उत्साह र मौद्रिक नीतिमा क्रमशः बढाइएको खुकुलोपनलगायत कारणले सन् २०२४ मा नेपालको अर्थतन्त्रको वृद्धिदर ३ दशमलव ९ प्रतिशत पुग्ने प्रक्षेपण गरेको हो।
आज (मंगलबार) सार्वजनिक भएको ‘नेपाल विकास अपडेटः निर्यातको प्रतिस्पर्धात्मकता पुनःस्थापना’ ले सन् २०२५ सम्ममा नेपालको अर्थतन्त्र ५ प्रतिशतले बढ्ने अनुमान पनि गरेको छ।
अनियमित वर्षाका कारणले कृषि उपज उत्पादनको वृद्धिमा हुनसक्ने क्षति, भारतको निर्यात प्रतिबन्ध र उपभोग्य वस्तुमा पछिल्ला दिनमा अकाशिएको मूल्यका कारण हुनसक्ने मूल्यवृद्धि र उच्च मुद्रास्फितिका कारण बढ्दै जाने नीतिगत दर, आन्तरिक ऋण व्यवस्थापन खर्च र वृद्धिमा हुनसक्ने ढिलासुस्तीलगायत जोखिम पनि विद्यमान रहेकोतर्फ प्रतिवेदनले ध्यानाकर्षण गराएको छ।
प्रतिवेदनले नेपालको बाह्य प्रतिस्पर्धी क्षमता बढाउन सहयोगी हुनसक्ने विभिन्न पक्षको पनि खोजी गरेको छ। सन् २०२३ मा राष्ट्रको कुल गार्हस्थ्य उत्पादनको ६ दशमलव ९ प्रतिशत मात्रै कूल निर्यात थियो। जुन दक्षिण एशियाका मध्यम आय भएका देशहरूको औसतको एक तिहाइ मात्रै हो।
प्रतिवेदनमा नेपालको निर्यात न्यून हुनुमा विद्यमान न्यून श्रम उत्पादकत्व र विनिमय दरको अभिमूल्यनलगायत कारक रहेको उल्लेख छ। साथै, समकालीन देशहरू र मुख्य व्यापार साझेदार भारतको तुलनामा कृषि, उद्योग र सेवा तीनै क्षेत्रमा रहेको श्रम उत्पादकत्वको गिरावटबाट पनि नेपाल प्रभावित रहेको औंल्याइएको छ।
‘विभिन्न चुनौतीका बावजुद नेपालले आफ्नो दीर्घकालीन आर्थिक पुनरूत्थानलाई आकार दिन आफ्नो हरित, उत्थानशील तथा समावेशी विकास नीतिको कार्यान्वयनतर्फको कदम जारी राखेको छ,’ नेपाल, श्रीलङ्का तथा माल्दिभ्सका लागि विश्व बैंकका राष्ट्रिय निर्देशक फारिस हदाद जर्भोसले भने।
मूल्य र गुणस्तर दुवैका हिसाबले नेपालको पुनरूत्थान र निर्यात बजारमा थप प्रतिस्पर्धात्मक बन्नका लागि मुख्य प्रेरक शक्ति भनेको नै बाह्य प्रतिस्पर्धात्मकतामा सुधार भएको उनको भनाइ छ।
त्यसका लागि घरेलु उत्पादन बढाउन सहयोग हुने सुधारका काम र नेपालका व्यापार साझेदारसँगको मुद्रास्फिति अन्तर घटाउने प्रयासमा विशेष जोड दिनुपर्ने हदादको भनाइ छ।
नेपाल विकास प्रतिवेदन आजै सार्वजनिक भएको ‘दक्षिण एशिया विकास अपडेट्स टुवार्ड फास्टर, क्लिनर ग्रोथ’ को एक अंश हो। यसले यस क्षेत्रको वृद्धिदर ५ दशमलव ८ प्रतिशत हुने अनुमान गरेको छ।
यो दर अन्य कुनै पनि विकासशील क्षेत्रको तुलनामा उच्च हो तर सोही क्षेत्रको महामारीपूर्वको रफ्तार र विकास लक्ष्यहरू हासिल गर्न आवश्यकभन्दा भने कम हो।
तपाईंको ईमेल गोप्य राखिनेछ ।