|

काठमाडौं : काठमाडौं मेडिकल कलेजमा विश्वकै दुर्लभ क्यान्सरको बिना चिरफार सफल उपचार गरिएको छ। काठमाडौंको कपनका ४९ वर्षीय दावा शेर्पाको कलेजोमा रहेको एक सेन्टिमिटरभन्दा सानो क्यान्सरको सेल नष्ट गरिएको हो।

बिरामी शेर्पाको रेडियो फ्रिक्वेन्सी एब्लेसन प्रविधिबाट सफलतापूर्वक विश्वकै सानो दुर्लभ क्यान्सरको उपचार गरिएको केएमसीका इन्टरभेनसन रेडियोलोजी विशेषज्ञ डा.पंकज काफ्लेले जानकारी दिए।

एक सेन्टिमिटरभन्दा सानो क्यान्सर पत्ता लगाएर बिना चिरफार सफलतापूर्वक नष्ट गरिएको यो विश्वमै दुर्लभ केस भएको डा.काफ्ले बताउँछन्।

नेपालमा पहिलोपटक यस्तो केसको सफलतापूर्वक उपचार गरिएको उनको दाबी छ।

बिरामीलाई हेपाटाइटिस पोजेटिभ भएकाले उपचार गर्नसमेत जोखिम थियो। तर, पनि, केएमसीका कलेजो रोग विशेषज्ञ डा. शेखर पौडेल र डा.काफ्लेसहितको टोलीले क्यान्सर सेल नष्ट गरेका हुन्।

अहिले बिरामीको स्वास्थ्य अवस्था राम्रो छ। रेडियो फ्रिक्वेन्सी एब्लेसन प्रविधिबाट बिना चिरफार क्यान्सर नष्ट गरिएकाले बिरामीलाई सहज भएको हो।

यो प्रविधिबाट बिना चिरफार, कडा औषधी र रेडियोथेरापी प्रयोग नगरी सहज रूपमा ट्युमरलाई नष्ट गर्न सकिने चिकित्सकहरूको भनाइ छ।

रेडियो फ्रिक्वेन्सी एब्लेसनबाट केएमसीमा अन्य अस्पतालको तुलनामा सस्तो मूल्यमा उपचार गर्ने गरिएको केएमसीका जनरल मेनेजर नारायण दाहालले जानकारी दिए।

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.