काठमाडौँ : काठमाडौँसहित देशभर अत्यधिक चिसो बढ्न थालिसकेकाले यो मौसममा रुघाखोकी लाग्दैमा औषधि नखान विज्ञहरूले सुझाव दिएका छन्।
जाडो मौसममा विशेषगरी बालबालिका तथा ज्येष्ठ नागरिकलाई बढी स्याहार चाहिन्छ। विज्ञहरूले जाडो मौसममा बालबालिकालाई श्वासप्रश्वाससम्बन्धी, रुघाखोकी, घाँटीको सङ्क्रमण, पेट दुखाइलगायत समस्या बढी देखिने भन्दै आवश्यक सावधानी अपनाउन आग्रह गरेका हुन्।
कान्ति बाल अस्पतालका बालरोग विशेषज्ञ डा. रामहरि चापागाईंले जाडोमा विशेषगरी श्वासप्रश्वाससम्बन्धी रुघाखोकी, निमोनिया, ‘कोल्ड डाइरिया’ (चिसोले हुने झाडापखाला)का समस्या बढी देखिने बताएका छन्।
‘चिसोबाट बालबालिकालाई जोगाउन पौष्टिक आहारको जरुरत पर्छ। जुनसुकै समयमा पनि बालबालिकालाई पौष्टिक आहार आवश्यक पर्ने भए पनि जाडोमा अन्य समयमा भन्दा बढी चाहिन्छ। यसले साधारण रोग पचाउन सहयोग गर्छ’, उनले भने। साथै सरकारले उपलब्ध गराएका सबै खोप लगाउनुपर्ने उनको भनाइ छ।
‘खोप लगाएका बच्चालाई अरूलाई भन्दा कम रोग लाग्छ। दादुराको खोप लगाएका बच्चालाई निमोनिया हुने जोखिम कम हुन्छ’, डा चापागाईंले भने। जाडोमा बालबालिका चिसो मानेर नुहाउन नमान्ने, हातगोडा धुन गाह्रो मान्ने भएकाले पनि रोगको सङ्क्रमण बढी देखिने उनको भनाइ छ।
रुघाखोकी लाग्दैमा औषधि खानु वा खुवाउनु नहुने भन्दै कान्ति बाल अस्पतालका बालरोग विशेषज्ञ डा. चापागाईंले निरन्तर रुघाखोकी लागेमा विशेषज्ञ चिकित्सको परामर्श लिनुपर्नेमा जोड दिए।
डा. चापागाईंले भने, ‘सरसफाइमा ध्यान दिन सके जाडो वा गर्मीमा रोग लाग्ने सम्भावना कम रहन्छ। बच्चाहरू चिसोमा नुहाउन अल्छी मान्छन्। सरसफाइ नहुँदा छालाका रोग पनि देखिन सकिन्छ।’
उनले जाडोयाममा कोठा न्यानो राख्न हिटर तथा कोइला बाल्दा जहिले पनि स्वच्छ हावाको आवतजावत हुने वातावरण बनाइराख्न र झ्याल तथा ढोका ड्याम्म नलगाउन आग्रह गरे।
त्रिवि शिक्षण अस्पतालकी बाल स्वास्थ्य नर्सिङ विभागकी सहप्राध्यापक अप्सरा पाण्डेले जाडो मौसम शुरु भएसँगै अभिभावकले आफ्ना बालबालिकालाई पर्याप्त मात्रामा झोलिलो खान, न्यानो लुगा लगाइदिन, दैनिक १५ देखि ३० मिनेट घाम ताप्न लगाउने लगायत काम गर्नुपर्ने बताए।
उनले भने, ‘घाम ताप्दा शरीरलाई चाहिने भिटामिन डी प्राप्त हुन्छ र प्रतिरक्षा प्रणाली बलियो बनाउन सहयोग गर्छ। सङ्क्रमणको उच्च जोखिममा रहेका बालबालिकालाई स्वास्थ्यकर्मीको सल्लाह लिएर भाइरल फ्लूविरुद्धको खोपसमेत दिन सकिन्छ। श्वासप्रश्वासको सङ्क्रमण भएका व्यक्तिको सम्पर्कमा जाँदा मास्क लगाइदिनुपर्छ।’
बाल स्वास्थ्य नर्स डा. सुरक्षा सुवेदीले पनि जाडोमा बालबालिकालाई बढी स्याहार आवश्यक हुनाले तातो तथा झोलिलो खानेकुरामा जोड दिनुपर्ने बताए।
डा. सुवेदीले बालबालिकालाई राति सुत्ने समयमा न्यानो बनाउन मोजा र टोपी अनिवार्य लगाइदिन अभिभावकलाई आग्रह गरे। ‘जाडोमा छाला सुक्खा भइराख्ने हुनाले ‘मोस्चराइजर’ लगाइदिनुपर्छ। हिटर बालेर मसाज गर्दा पनि धेरै बेरसम्म बाल्नुहुँदैन। छालामा असर गर्न सक्छ।’
कान्ति बाल अस्पतालका बालरोग विशेषज्ञ डा. चापागाईंले जाडोमा बालबालिकालाई रुघाखोकी बढी देखिने भएकाले अभिभावक आत्तिन नहुने बताए।
पौष्टिक आहार, झोलिलो खानपान, पर्याप्त मात्रामा आराम गर्दा भाइरल रुघाखोकी पाँच–छ दिनमा हराएर जाने डा चापागाईंले बताए। उनले रुघाखोकी लाग्दैमा औषधि जथाभावी पसलबाट औषधि किनेर खुवाउन हतार नगर्न अभिभावकलाई सुझाव दिए।
तपाईंको ईमेल गोप्य राखिनेछ ।