पुष्पसदन टेबलटेनिसमा प्राइम ग्लोबलको वर्चस्व

काठमाडौं : पुष्पसदन विद्यालयस्तरीय टेबलटेनिस प्रतियोगीता बिहीबारदेखि कीर्तिपुरमा सुरु भएको छ। 

पुष्पसदन सेकेण्डरी बोर्डिङ स्कुलको आयोजनामा भएको प्रतियोगिताको पहिलो दिन प्राOम ग्लोबल स्कूलले वर्चस्व कायम गरेको छ।  छात्र र छात्रा दुबैतर्फको टिम इभेन्ट्समा प्राईम ग्लोबल विजेता भएको छ। 

छात्रतर्फ प्राइम ग्लोबल पहिलो हुँदा मंगल सेकेण्डरी स्कूल दोस्रो भएको छ भने हिल टाउन सेकेण्डरी स्कूल र आइडियल मोडल स्कूल संयुक्त रुपमा तेस्रो भएका छन्।

यसैगरी पुष्पसदन टेबलटेनिसको छात्रातर्फ प्राइम ग्लोबल विजेता बन्दा स्बर्णिम स्कूल दोस्रो तथा मंगल सकेण्डरी स्कूल र आयोजक पुष्पसदन तेस्रो भएका छन्। खेल पुष्पसदनको टेबलटेनिस कोर्टमै भएको हो। 

बिहीबार नै सम्पन्न यु–११ छात्रतर्फको उपाधी बृहस्पती विद्यासदनका विनम्र घिमीरेले जितेका छन्। ​आइडियल मोडल स्कूलका सत्भिकरत्न शाक्य दोस्रो हुँदा डिलाइट किण्डर गार्डेन स्कूलका रुसन शाक्य र केटिएम ग्लोबल स्कूलका कीर्तन श्रेष्ठ तेस्रो भएका छन्।

बिहीबार यु–११ को छात्रातर्फको प्रतिस्पर्धाबाट विजयी हुँदै पुष्पसदनकी क्रिष्टल भूषाल र प्राइम स्कूलकी नमिला फाइनलमा पुगेका छन्। यो इभेन्टको फाइनल प्रतिस्पर्धा शनिबार हुनेछ।

शुक्रबार यु–१३ का छात्र र छात्रा तथा सिनियर छात्र र छात्रातर्फको प्रतिस्पर्धा हुने पुष्पसदनका इसिए संयोजक राजु लामाले जानकारी दिए।  उनका अनुसार यी इभेन्ट्सको फाइनल खेल पनि शनिबारै हुनेछन्।  

माघ २६ गतेसम्म चल्ने प्रतीयोगीतामा ३० वटा विद्यालयका २ सय ३० जना विद्यार्थीले सहभागिता जनाएका छन्। प्रतियोगिताको उद्घाटन पुष्पसदनका अध्यक्ष महेश श्रेष्ठ र सोफेज नेपालका अध्यक्ष रामकृष्ण मर्हजनले गरे। 

प्रतियोगितामा १ सय ५४ जना छात्र तथा ७६ जना छात्राले प्रतियोगिता प्रतिस्पर्धा गरेका छन्। विजेताले ट्रफी, मेडल र प्रमाणपत्र पाउनेछन्। पुष्पसदनले एक महिना अघि मात्रै चेस प्रतियोगिता गरेको थियो।