गुल्मी : मुसिकोट नगरपालिका-६ स्थित कुर्घाको मालिका मन्दिर पुनर्निर्माण गरिएसँगै श्रद्धालु को सङ्ख्यामा वृद्धि भएको छ।
पौराणिक महत्त्व बोकेको मालीका मन्दिर परिसर वरपर देखिने सुन्दर दृश्यले पर्यटकलाई लोभ्याउने गरेको छ। मालिका मन्दिरमा वर चिच्याएर माग्नुपर्छ। यहाँ विषेश पर्वहरुमा श्रद्धालुहरुको घुइँचो लाग्छ। यहाँ दर्शन एवं पूजाआजा गर्न गुल्मीलगायत अर्घाखाँची, बागलुङ, प्युठान, बुटवल, काठमाडौंलगायत ठाउँबाट श्रद्धालु आउने गरेका छन्। मालिका मन्दिरमा वर मागे र भाकल गरेपछि मनले चिताएको कुरा पूरा हुन्छ भन्ने जनविश्वास छ। भाकल गरेपछि परेवा उडाउने र बली दिने प्रचलन छ।
मन्दिर नजिकैको ठूलो चट्टानबाट निस्किएको पानीको मूल यस मन्दिरमा पुग्नेहरुका लागि थप सुन्दर र आकर्षक मानिन्छ। सानो पानीको कुण्डमा रङ्गिबिरङ्गी माछाहरु तैरिरहेको दृश्यले त्यहाँ पुग्ने जोकोहीको मन लोभ्याउँछ। मालिका मन्दिरमा बैकुण्ठ चतुर्दशी एवं कार्तिक शुक्ल चतुर्दशीमा भक्तजनको घुइँचो लाग्ने स्थानीय ज्ञानहरि सापकोटाले बताए।
मालिका क्षेत्रमा किम्मु, बर र सिमलका रुख रहेका र तिनै रुखको फेदमा माल्याश्री नामका ऋषिले तपस्या गरेको भन्ने किंवदन्ती छ। उक्त क्षेत्रमा प्रशस्त मात्रामा वनजङ्गल रहेकाले जङ्गली जनावर र चराचुरुङ्गीको वासस्थान छ। पानीको हाहाकार भएपछि त्यसै समयमा देवी प्रकट भएर ‘वरदान माग’ भन्दा माल्याश्री ऋषिले पानीको अभावले प्राणीहरुले दुःख पाएको भनेर पुकार गरेपछि देवी मालीका भगवती प्रसन्न भएर मन्दिर परिसरमा जलकुण्ड निकाली जीवन रक्षा गरेको भन्ने विश्वास छ। चट्टानको बीचमा सानो जलकुण्ड छ। यहाँ साउन र माघ महिनामा बलि चढ्दैन।
मन्दिर नजिकै स्वाँरामा होमस्टे सञ्चालन गरिएको छ। मन्दिरबाट फर्केपछि दर्शनार्थीहरु होमस्टेमा बास बस्नुका साथै रैथाने बस्तुका विभिन्न परिकारको स्वाद लिने गरेका छन्। मालिका क्षेत्रको विकासका लागि मुसिकोट नगरपालिकाले सडक, खानेपानी, मन्दिर पुनःर्निमाण, व्यवस्थापन लगायतका क्षेत्रमा सहयोग पुर्याउँदै आएको नगरप्रमुख जीवलाल खरेलले बताए।
तपाईंको ईमेल गोप्य राखिनेछ ।