काठमाडौं : सरकारले गुठीसम्बन्धी समस्या समाधान गर्न सार्वजनिक सूचना जारी गरी गुठीयारहरूको सुझाव लिने भएको छ।
भूमि व्यवस्था, सहकारी तथा गरिबी निवारण मन्त्री पद्यमाकुमारी अर्यालले प्रत्येक ठाउँ, किसान तथा गुठी विशेष फरकफरक विशेषता र समस्या रहेकाले त्यसको समाधान गरी विधेयक ल्याउनका लागि सार्वजनिक सूचनामार्फत सबैको सुझाव लिने बताएकी हुन्। मंगलबार ललितपुरमा आयोजित गुठीयारहरूसँगको अन्तरक्रियामा मन्त्री अर्यालले गुठी विद्येयक ल्याउन र समस्या समाधान गर्नका लागि विज्ञहरू सम्मिलित सम्मेलन गर्नुपर्ने बताइन्।
मन्त्री अर्यालले गुठीले संरचना निर्माण र विकासका काम नगर्ने तर धर्म संस्कृति र मरम्पराको संरक्षण मात्र गर्ने बताइन्। गुठीमा धेरै समस्या रहेको उल्लेख गर्दै समाधानका लागि सबै गुठीयारहरूको सुझाव आवश्यक रहेको उनले औँल्याइन्।
मन्त्री अर्यालले सयौँ वर्षदेखिको बेथिति दुई चार महिनामा हटाउन नसकिने बताउँदै विकास निर्माणमा गुठीको पुरानो कानूनले अवरोध गरेको बताइन्। उनले सरकारले गुठीमा रहेका बेथितिलाई ठीक बनाउनका लागि नयाँ विधेयक ल्याउन खोजेको स्पष्ट पारिन्।
कार्यक्रममा मन्त्री अर्यालले गुठी जग्गाको अतिक्रमण बढेकाले गुठीको संरक्षणमा सरकारको ध्यान गएको बताइन्। उनले जनताको भावनाको प्रतिनिधित्व नगर्ने कानून विकासको बाधक बनेको उल्लेख गर्दै अब आउने भूमि विधेयक सरकार, सरोकारवाला र गुठियारहरूबीचको सहमतिको साझा दस्तावेज हुने बताइन्।
कार्यक्रममा गुठीयारहरूले गुठीको व्यवस्थापनका नाउँमा अस्तित्व मेटिनेगरी विधेयक ल्याएमा विद्रोह हुने बताएका छन्।
तपाईंको ईमेल गोप्य राखिनेछ ।