अमेरिकाको ठूलो सहयोग गुमाउनै नहुने जिकिर
अमेरिकाको ठूलो सहयोग गुमाउनै नहुने जिकिर
काठमाडौं : चर्को विवादमा परेको अमेरिकी परियोजना मिलेनियम च्यालेन्ज कर्पोरेशन (एमसिसी) बारेमा सत्तारुढ र प्रतिपक्षीको स्वर मिलेको छ।
एमसिसीका कारण सत्तारुढ नेपाल कम्युनिष्ट पार्टी नै दुई ध्रुबमा विभाजित भएकाले मंगलबार बसेको प्रतिनिधि सभाको बैठकमा प्रधानमन्त्री केपी शर्मा ओलीले एमसिसी पास गर्नैपर्ने कुरा बताए।
ओलीले समय तीव्र गतिमा अघि बढेकाले अब रोकिन नहुने बताउँदै एमसिसी संसदबाट पास गर्ने प्रष्ट पारे। ओलीले अब ढिलो भइसकेको पनि जिकिर गरे।
‘हामी ढिलो भइसकेका छौँ, सभामुख चयनमा ढिला गर्यौँ’, उनले भने, ‘हाम्रा कामहरुलाई संसदले पनि सरकारले पनि तीव्र गतिमा अगाडि बढाउन जरुरी छ। अब ढिला गरेमा हामी पछाडि पर्छौँ।’
ओलीले एमसिसी यही हिउँदे अधिवेशनबाट पारित हुने उल्लेख गरे। ‘धेरै अगाडिदेखि बढ्दै आएको ६÷७ प्रधानमन्त्री गुजार्दै आएको एमसिसी पारित गर्नुपर्ने छ। योसँगै अरु विषय पनि पारित गर्नु छ।’
ओलीले हिउँदे अधिवेशनमा अलिकति समय खेर गए पनि अब खेर जान नदिएर अगाडि बढ्नुपर्ने ओलीले जोड दिए। सभामुखलाई बधाई भाषणका क्रममा ओलीले देउवाका कुरा चाख मानेर सुनेका थिए। त्यसक्रममा देउवाले बोलिसकेपछि दुईजनाबीच संसदमै गफ पनि भएको थियो।
देउवाले मिलाए लय
प्रमुख प्रतिपक्षी नेपाली कांग्रेसका सभापति तथा संसदीय दलका नेता शेरबहादुर देउवाले अमेरिकी परियोजना एमसिसी संसदबाट पास गर्नैपर्ने बताए।
नवनिर्वाचित सभामुख अग्नि सापकोटालाई बधाई दिन प्रतिनिधि सभाको मंगलबारको बैठकमा सम्बोधन गर्दै उनले यस्तो बताएका हुन्। प्रधानमन्त्री तथा नेकपा अध्यक्ष ओलीले बोलेलगत्तै बोलेका उनले एमसिसीकै कारण नेपालमा सबैभन्दा धेरै पैसा आएको पनि जिकिर गरे।
‘एमसिसीबाट यति ठूलो सहयोग आएको छ। यस्तो सहयोग अमेरिकाबाट कहिले आएको थिएन’, उनले भने, ‘यस्तो आर्थिक सहयोग सदुपयोग गर्नुपर्छ। बिजुलीको लाइन विस्तारमा हामीले यसलाई सदुपयोग गर्नुपर्छ।’
नेकपा केन्द्रीय कमिटी
एमसिसीलाई लिएर तीव्र विवाद चलिरहेका बेला यही माघ १५ गतेदेखि नेकपा केन्द्रीय कमिटी बैठक बस्दैछ। त्यही बैठकको एजेन्डा तय गर्न मंगलबार अपरान्ह नेकपा सचिवालय बैठक बसेको छ।
एमसिसीको विवादले पार्टीका नेताहरु दुई धारमा उभिएको अवस्थामा केन्द्रीय कमिटी बोलाइएको हो। प्रधानमन्त्री केपी शर्मा ओली र अर्का अध्यक्ष पुष्पकमल दाहाल एमसिसी पास गर्ने मुडमा छन्।
तर वरिष्ठ नेता माधवकुमार नेपालसहित एमसिसीको विपक्षमा उभिएका छन्। नेकपाका प्रभावशाली नेता तथा गृहमन्त्री रामबहादुर थापा बादलले एमसिसीका केही बुँदा संशोधन गरेर मात्रै पास गर्नुपर्ने मत राखेपछि यो विवाद अझै चर्किने देखिएको छ।
नेताहरु भीम रावल, देव गुरुङसहितले विपक्षमा मत राखिरहेका बेला नेकपाका प्रवक्ता नारायणकाजी श्रेष्ठले पनि नेपालको हितमा राखेर मात्रै एमसिसी सदनबाट पास गर्नुपर्ने बताएका छन्।
अमेरिकी दूतावासले पनि एमसिसी इन्डो प्यासिफिक रणनीतिकै अंग भरिहेका बेला नेकपाको संस्थापन पक्ष पास गर्नै पर्ने अडानमा छ। एमसिसीबारे नेकपामा एकमत नहुन्जेल सदनमा अघि बढ्न नसक्ने अवस्था रहेका बेला केन्द्रीय कमिटीले यसबारे निर्णय लिनेछ।
तपाईंको ईमेल गोप्य राखिनेछ ।