साहित्य

कविता : हे शहीद तिमीलाई लाख लाख अभिवादन

माघ १६, २०७६

    त्यो को हो जो आफू मरेर पनि जीवित छ?

    त्यो को हो जो अब फेरि जन्म मृत्युको चक्करमा हुने छैन?

    त्यो त मेरा लागि, मेरो देशका लागि

    शहादत दिएको शहीद हो जो मभित्रै जीवित छ

    जो व्योमविहारबाट नेपालको रक्षा गरिरहेको छ

     

    भन्न त भनियो ऊ छैन तर

    ऊ कहाँ गएको छ र?

    किनभने ऊ हामीभित्रै जीवित छ

    ऊ मेरो माटोको सुवास हो

    ऊ मेरो वनको बास्नादार फूल हो

    ऊ त्यो साना साना बालकको तोते बोलीमा बोल्छ

    ऊ ती वैज्ञानिकहरूको खोजीमा देखिन्छ

    ऊ त्यो सगरमाथाको चुचुरोमा बसेर नेपालको चियो गर्छ

    अनि नेपालको भलोमात्र चाहने कल्पना गर्नेलाई प्रेरणा दिन्छ

    हो ऊ त्यही शहीद हो जो म, तिमी, तपाईं र हामीभित्र नेपाल भएर बाँच्छ

     

    यो देशको स्वतन्त्रता-जसको ऊ नै पूजारी हो र कर्ता हो

    यो देशको प्रजातन्त्र-जसको मुख्य लक्ष्यमा स्थापना भएको थियो

    यो देशको विकास-जसको कल्पनामा अमिट छाप रहेको थियो

    र त ऊ त्यही सपना साकार गराउन

    निर्भयताका साथ शहादत दिन लालायीत भएको थियो

    अनि ऊ निःस्वार्थ यो माटोका रक्षाका लागि

    यो माटोका सुरक्षाका लागि

    यहाँका जनताको भविष्यका लागि अगाडि बढ्यो निडर भएर

     

    त्यसपछि ऊ मेरो देशको शहीद भयो

     

    भन्दछन्-८४ लाख योनी घुमेर मात्र मानव चोला पाइन्छ

    भन्दछन्-त्यस्तो मानव जीवनलाई पनि मानवता र मुलुकका लागि न्यौछावर गर्ने

    महामानव नै त शहीद कहलाउँछन्

    हे शहीदहरू हो-वर्षमा एकदिनमात्र तिमीहरुलाई सम्झेका होइनौँ

    हामी त सधैँ तिमीलाई सम्झेरमात्र आफ्नो दिनको सुरुवात गर्छौँ

    तिमीलाई सम्झेरमात्र जीवनको महत्वलाई पानीको फोका भन्दा पनि

    मुलुकको लागि कसरी समर्पण गर्न सकिन्छ भनेर

    प्रेरणाको श्रोत मानेका छौँ त्याग र तपस्याको प्रतिमूर्तिका रूपमा

     

    ती शहीदहरूलाई सलाम छ

    नमस्कार छ, लाख लाखपटक

    जसले जीवनको बलिदान दिएर

    फेरि अमर जीवन बाँच्न सकेका छन्

    ती शहीदहरूलाई सलाम छ

    ती शहीदहरूलाई फेरि पनि सलाम छ।

हरिविनोद अधिकारी

पत्रकार अधिकारी समसामयिक विषयमा कलम चलाउँछन्।

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
सुमार्गी बी कम्प्लेक्स
बबरमहल- ११, काठमाडौं, नेपाल

इमेलः
समाचार विभाग: इमेल-thahakhabar16@gmail.com
फोन : ९७७-१- ४२६१९४१
बिज्ञापनः फोन- ९७७-१-४२६३४५४
९८५१०७६३३६(सञ्जय नेपाल)
इमेल: mkt.thahakhabar@gmail.com

हाम्रो बारेमा

प्रधान सम्पादक: तीर्थ कोइराला
सूचना विभाग दर्ता नं.: ७७८/२०७४-७५

[विस्तृत]