सर्लाही : विद्युत् प्राधिकरण वितरण केन्द्र लालबन्दी केन्द्रको महसुल बक्यौता १३ करोड रुपैयाँ भन्दा वढी नाघेको छ। चालू आर्थिक वर्षको आठ महिनासम्म प्राधिकरणले ग्राहकबाट असुल गर्नुपर्ने महसुल बक्यौता १३ करोड ८५ लाख २० हजार २०० रुपैयाँ पुगेको छ।
केन्द्रका प्रमुख सुधिरकुमार रायले कूल ग्राहकमध्ये उद्योग, कलकारखाना र गार्हस्थ्यका ग्राहकबाट सो रकम महसुल बक्यौता रहेको जानकारी दिए। केन्द्रको त्रिचालिस हजार ९०० ग्राहक मध्ये ५० प्रतिशतले मात्र नियमित महसुल बुझाउने गरेका र लाइन नकाटेसम्म बाँकी ग्राहकले महसुल नबुझाउने गरेको उनले बताए। ती ग्राहकमध्ये ९४ प्रतिशत गार्हस्थ्य र बाँकी ६ प्रतिशत उद्योगधन्दा सेवाग्राही रहेका जनाइएको छ।
बक्यौता सबैभन्दा धेरै ओम शान्ति फ्रुट प्रोडक्सन प्रालिको २७ लाख ५० हजार ८१२ रुपैयाँ रहेको जनाइएको छ। तर सो प्रालिले मासिक १० लाख रुपैयाँभन्दा बढी महसुल नियमित तिर्ने गरेको कार्यालयले जनाएको छ। त्यसैगरी केही ग्राहकले समयसमयमा मात्र नभई लाइन काटिँदासमेत विद्युत् महसुल बक्यौता नतिरेका कारण कालो सूचीमा राखिएको छ।
सामान्यतय दुई महिना अर्थात ६० दिनसम्म बक्यौता महसुल बुझाउने ग्राहकको लाइन नकाटिएको र सो समयभन्दा बढी समयसम्म पनि महसुल बुझाउन नआउने ग्राहकको लाइन काटिएको छ। 'आफूहरुले महसुल बुझाउने समय नाघेका ग्राहकहरुलाई एक पटक विद्युत् महसुल बुझाउन आउन आग्रह गर्ने गरेको र सो समयमा महसुल बुझाउन नआउने वा कार्यलयको आग्रहलाई बेवास्ता गर्ने ग्राहकहरुको लाइन काट्ने गरेको छौं,' उनले भने। कतिपय ग्राहकहरु लाइन काटिएपछि मात्र महसुल बुझाउन आउने गरेका कार्यलयले जनाएको छ।
गार्हस्थ्य तथा औद्योगिक क्षेत्रका ग्राहकहरु मात्र नभई सरकारी तथा गैरसरकारी कार्यालयहरु पनि विद्युत् महसुल समयमै नतिर्ने सूचीमा परेका छन्। मिटर जडान नगरी विद्युत् तारमा हुक लगाएर तथा मिटरबाट नै चोरी गरी बत्ती बाल्नेहरुको सङ्ख्यामा केही सुधार आएको कार्यालयले जनाएको छ। ७२ जना ग्राहकलाई चोरी चुवाहटमा संग्लग्न भएको भन्दै कारवाही गरिएको छ।
लालबन्दी, ईश्वरपुर, हरिवन नगरपालिका सबै वडा, वाग्मती नगरपालिकाका ६ वडा, कविलासी नगरपालिकाका वडा नम्बर १ र २ का साथै हरिपुर नगरपालिकाका सबै वडाहरु विद्युत् प्राधिकरण वितरण केन्द्र लालबन्दी केन्द्रको सेवाक्षेत्र रहेको छ। चालू आर्थिक वर्षको श्रावणदेखि माघ २७ गतेसम्म १७ करोड ४६ लाख ५९ हजार ८०० रुपैयाँ महसुल सङ्कलन र साही अवधिमा १३ करोड ११ लाख ३६ हजार २१२ रुपैयाँ महसुल बक्यौता बाँकी रहेको कार्यालयले जनाएको छ।
चालू आर्थिक वर्षको माघ महिनासम्ममा २८२ जना ग्राहकको महसुल नतिरेका कारण लाइन काटिएको उनीहरुबाट एक करोड १८ लाख ९५ हजार १२१ रुपैयाँ बराबर बक्यौता रहेको थियो। २०६ ले विद्युत् महसुलबापतको रकम ७३ लाख ८१ हजार २१८ रुपैयाँ तिरेर लाइन पुनःसुचारु गरेको कार्यालयले जनाएको छ।
तपाईंको ईमेल गोप्य राखिनेछ ।