प्रहरी नै व्यापारीसँग गफ गरेर बस्छन्
प्रहरी नै व्यापारीसँग गफ गरेर बस्छन्
उदयपुर : उदयपुरको एउटै गाँउमा २८ जनामा कोरोना संक्रमण भएपछि प्रदेश सरकारले जिल्लालाई पूरै सिल गर्यो।
तर यति धेरै संख्यामा कोरोना संक्रमित भेटिँदा पनि जिल्लामा लकडाउन कार्यान्वयन फितलो देखिएको छ। लकडाउन कडा पार्न प्रशासन चुकेको देखिन्छ भन्ने सर्वसाधारण बेपर्वाह सडक र बजारमा देखिने गरेका छन्।
सुरुमा प्रहरी प्रशासनले केही कडाइ गरे पनि अहिले गाईघाट बजारमा अधिकांश स्थानमा भीडभाड अधिक हुन थालेको छ। दिउँसोको समयमा लकडाउन नै नभएको अनुभूति हुनेगरी बजारमा किनमेलका नाममा सर्वसाधारण घुमफिर गरिरहेका देखिन्थे।
सुरुका दिनहरुमा लकडाउन उल्लंघन गरी सडकमा निस्केकालाई प्रहरीले दिनभर नियन्त्रणमा लिएर साँझ सम्झाइबुझाई छाड्ने गरेको थियो। तर अहिले भने प्रहरी प्रशासनले खुलेआम हिँड्डुल गर्नेलाई रोक्न कुनै पनि सक्रियता देखाएको पाइँदैन।
मानिसहरुले सामाजिक दूरीलाई समेत बेवास्ता गर्ने र व्यवसायीमा पनि त्यसप्रति चासो नभएको देखिन्थ्यो। सर्वसाधारण पनि एक जनाले ल्याउन सक्ने सामग्री खरिद गर्न समूह नै बनाएर बाहिर निस्किएका देखिन्थ्यो।
बेलाबेलामा प्रहरी प्रशासनले ‘बजार पसल बन्द गर्न माइकिङ गर्दै हिँडे पनि कतिले प्रहरीको आँखा छलेर त कतिले खुलेआम प्रहरीकै अगाडि पसलहरु खोलेका देखिन्थे।
पत्रकारहरुले फोटो खिच्च थालेपछि पसलको सटर बन्द गर्ने र पत्रकार गएपछि फेरि व्यापार सञ्चालन गर्ने गरेका देखिन्थे। बजारमा विषेश गरी कपडा तथा कस्मेटिक पसलहरु बढी खुलेका थिए। कतिपय स्थानमा त प्रहरी नै व्यापारीसँग गफिँदै बसेको समेत थिए। यसबारे प्रमुख जिल्ला अधिकारी दीपककुमार पहाडीलाई जानकारी गराउँदा आफूलाई थाहा नभएको र प्रशासनले कडाइ गरेको बताए।
तपाईंको ईमेल गोप्य राखिनेछ ।