पाँचथर : फिदिम नगरपालिका–४ जोरसालमा सोमबार राति भएको आगलागीमा परी एकै घरका तीनजना घाइते भएका छन्। दीननाथ सापकोटाको घरमा आगलागी हुँदा ७२ वर्षीया तनमाया, ४९ वर्षीय दीननाथ र ३१ वर्षीय मदन सापकोटा घाइते भएका हुन्।
खाना पकाउने ग्याँस चुहिएर अचानक आगलागी भएको जिल्ला प्रहरी कार्यालय पाँचथरले जनाएको छ। आगलागीमा तनमायाको शरीरका विभिन्न भाग जलेका छन्। यस्तै, दीननाथको बायाँ हात र खुट्टा तथा मदनको दायाँ हात र पेट जलेको जिल्ला प्रहरी कार्यालय पाँचथरका सूचना अधिकारी डम्बर विश्वकर्माले जानकारी दिए।
घाइतेलाई जिल्ला अस्पताल फिदिम भर्ना गरिएको छ। आगलागी सुरक्षाकर्मी र स्थानीयवासीले समयमै नियन्त्रणमा लिँदा अन्य क्षति भने नभएको प्रहरीले जनाएको छ।
तपाईंको ईमेल गोप्य राखिनेछ ।