डडेल्धुरा : सुदूरपश्चिमको पहाडी जिल्ला डडेल्धुरामा विमानस्थल बनाउन सर्भे थालिएको छ। जिल्लाको अजयमेरु गाउँपालिका–१ पुइलेकमा विमानस्थल निर्माणका लागि सर्भे सुरु भएको हो।
गतवर्ष संस्कृति, पर्यटन तथा नागरिक उड्डयन मन्त्रालयले पठाएको टोलीले अजयमेरु गाउँपालिका–१ पुइलेकमा विमानस्थल निर्माणका लागि उपयुक्त रहेको निस्कर्ष निकालेको थियो। सोही अनुसार मंगलबारदेखि सर्भे सुरु भएको छ।
पुइलेक डडेल्धुरा सदरमुकामबाट १२ किलोमिटर टाढा पर्छ। यहाँसम्म पुग्ने पीच बाटोको समेत व्यवस्था छ। पुइलेकदेखि वयलडाँडासम्मको १२ सय मिटर जग्गामा सम्भाव्यता सर्भे सुरू भएको नेपाल नागरिक उड्ययन प्राधिकरणका उपप्रवन्धक नलविक्रम थापाले बताए।
प्राविधिक टोलीले सर्भेका लागि ड्रोन क्यामराको समेत प्रयोग गरेको छ। त्यहाँको भू–बनोटलगायत ल्यान्डिङ र टेकअफ गर्ने बेलाका लागि अपट्याकल लिमिटेसनलगायतका कुराहरूलाई हेर्दा पहाडी जिल्लाका लागि उपयुक्त स्थान रहेको उपप्रबन्धक थापाले बताए।
‘भौगलिक हिसाबले कठिन छ। सकेसम्म कम खर्चमा कसरी बनाउन सकिन्छ भनेर सर्भे गरिरहेका छौं,’ उनले भने, ‘सकेसम्म इकोनोमिक डिजाइन बनाउँछौं। विस्तृत कुरा सर्भेपछि मात्रै थाहा हुन्छ।’
२०७० सालबाट डडेल्धुरामा विमानस्थल निर्माणका लागि विभिन्न स्थानमा माग राखेको भए पनि वास्ता गरिएको थिएन। अहिले आएर पुइलेकमा सम्भाव्यता अध्ययनपश्चात् सर्भे गराउन सकेको राजनीतिज्ञ डा तारा जोशीको भनाइ छ।
‘विमानस्थल बनाउन थुप्रै स्टेपहरू छन्। सुरुमा अध्ययन भयो। त्यसपछि सम्भाव्यता अध्ययन भयो। अहिले हामी डीपीआर बनाउने प्रयास गरिरहेका छौं। रिपोर्ट आएपछि इआइएको प्रक्रिया सुरु हुन्छ। हेरौं कति समय लाग्छ,’ उनले भने, ‘त्यसपछि हामी डेन्डर, बजेट बनाउने कुराहरू अगाडि बढ्छ।’
विमानस्थलका लागि आवश्यक धावन मार्गको लम्बाइ, पर्याप्त मिलेको क्षेत्रफल भएको, तर जमिन भिरालो भए पनि राम्रो, धावन मार्ग, पहाडले छेक्ने सम्भावनासमेत भएको पाइएको प्राविधिकको भनाइ छ।
सर्भे हुन थालेपछि स्थानीय खुसी
सुदूरपश्चिमको पहाडी जिल्ला डडेल्धुरा विमानस्थल नभएको एक मात्र जिल्ला हो। यहाँका सात वटै पहाडी र दुईवटा तराईका जिल्लामा विमानस्थल रहेको छ। तर, पूरै सुदूरपश्चिम जोड्ने एक मात्र जिल्ला डडेल्धुरामा भने विमानस्थल भने बन्न सकेको छैन्।
डडेल्धुरामा विमानस्थल बने यहाँका नागरिकको आयस्तरमा समेत वृद्धि हुने अमरगढी नगरपालिकाका नगर उपप्रमुख संगीता भण्डारीले बताइन्।
उनले भनिन्, ‘यो ठाउँमा विमानस्थल बने मिनि मार्केटको रूपमा स्थापना हुन्छ। त्यसपछि यहाँका नागरिकले विभिन्न किसिमका व्यवसाय गर्न पाउँछन्। र, आर्थिकरूपमा समेत यहाँका नागरिक सम्पन्न हुन्छन्।’
डडेल्धुरामा विमानस्थल बन्नु जरुरी रहेको स्थानीय डिल्लीराज जोशीले बताए। यहाँ विमानस्थल बनाउन सबैले एकजुट हुनुपर्ने उनको भनाइ छ। पुइलेकमा विमानस्थल निर्माण भए सुदूरपश्चिमका ९ जिल्लाका जनताले सुविधा पाउने स्थानीय धनबहादुर साउदले बताए।
धनगढी नेपालगञ्जमा हुस्सुलगायतका कारणले उडान बन्द भए यहाँबाट उडान भर्न सकिने उनको भनाइ छ। ‘डडेल्धुरा सुदूरपश्चिमको राजधानीका लागि उपयुक्त जिल्ला हो। पर्यटकीय, भौगोलिक, सांस्कृतिक रूपमा पनि डडेल्धुरा उपयुक्त जिल्ला हो। यहाँ काठमाडौंबाट सिधै हवाइ उडान भर्न सकिन्छ,’ उनले भने।
तपाईंको ईमेल गोप्य राखिनेछ ।