बैतडी : गौरा पर्वको अवसरमा बैतडीका विभिन्न ठाउँमा सचेतनामूलक देउडा प्रतियोगिता आयोजना गरिएको छ।
देउडाको संरक्षण, संवर्धन र प्रवर्धनका साथै स्थानीय कला संस्कृतिको संरक्षण गर्ने उद्देश्यले देउडा प्रतियोगिता राखिएको आयोजक समितिका सदस्य मोहनसिंह बिष्टले जानकारी दिए।
समाजमा रहेका विकृति, विसंगति र कुप्रथा हटाउन सहयोग पुगोस् भनेर सचेतनामूलक देउडा प्रतियोगिताको आयोजना गरिएको हो।
पाटन नगरपालिका–८, खोड्पेमा भदौ २६ गतेदेखि २८ गतेसम्म महिला पुरुष संयुक्त देउडा प्रतियोगिताको हुने भएको छ।
खोड्पे बजार व्यवस्थापन समिति, सिद्धेश्वर खोड्पे खानेपानी तथा सरसफाइ उपभोक्ता समिति र राममन्दिर व्यवस्थापन समितिको आयोजनामा प्रतियोगिता हुन लागेको हो।
प्रतियोगितामा प्रथम हुनेलाई १० हजार, द्वितीयलाई ७ हजार, तृतीयलाई ५ हजार र सान्त्वनालाई २ हजार नगद पुरस्कारसहित प्रमाण प्रदान गरिनेछ।
यसैगरी भदौ २२ गते सनातन धर्म मावि श्रीकोटको प्रांगणमा देउडा कार्यक्रमको आयोजना गरिएको छ। प्रतियोगितामा प्रथम हुनेलाई १० हजार, द्वितीयलाई ७ हजार र तृतीयलाई ४ पुरस्कार प्रदान गरिनेछ।
यस्तै मेलौलीमा भदौ ३० गते विपद् जोखिम न्यूनीकरण सम्बन्धी देउडा प्रतियोगिता हुने भएको छ।
यसैबीच जिल्लाको पञ्चेश्वर गाउँपालिका–३ कुलाउँमा द्वारिकादेवी चन्द ठकुरानी प्रतिष्ठान शाखाको आयोजनामा देउडा प्रतियोगिता सम्पन्न भएको छ।
गौरा पर्वको अवसरमा यहाँका विभिन्न स्थानीय तहले सार्वजनिक बिदा दिएका छन्। जिल्लाको दोगडाकेदार र सुर्नया गाउँपालिकाले भदौ २१ र २२ गते, डिलाशैनी गाउँपालिका, पाटन र दशरथचन्द नगरपालिकाले भदौ २१ गते सार्वजनिक बिदा दिएका छन्।
तपाईंको ईमेल गोप्य राखिनेछ ।