मकवानपुर : गाँउपालिकाले कोदो र फापर खेतीमा अनुदान दिन थालेपछि भीमफेदीका किसान उत्साहित भएका छन्।
गाउँपालिकाले कोदो खेती गर्ने वडा नम्बर ३ का किसानलाई नगद अनुदान वितरण गरेको हो। अध्यक्ष हिदम लामाले शुक्रबार नगद अनुदान वितरण गर्दै शहरबजारमा कोदो र फापरको उपभोग बढेकाले उत्पादन बढाएर मुनाफा आर्जन गर्न किसानलाई आग्रह गरे।
भीमफेदीको एक हजार ६० रोपनी जग्गामा २६६ किसानले कोदो रोपेका र त्यसबाट १०० मेट्रिक टन कोदो उत्पादन हुने अनुमान गरिएको छ।
चालु आर्थिक वर्षमा २० लाख कोदो उत्पादन बढाउन पालिकाले अनुदानको व्यवस्था गरेको अध्यक्ष लामाले बताए । यो वर्ष अपेक्षाअनुसार मकै उत्पादन नभएकाले कोदोले त्यसको अभाव परिपूर्ति गर्ने उनले बताए।
अनुदान पाएका किसान बाहेक पालिकाका अन्यले पनि कोदो खेती गर्दै आएका तथा भीमफेदीमा मात्र दुई हजार रोपनीभन्दा बढी क्षेत्रफलमा कोदो खेती भइरहेको कृषि ज्ञान केन्द्रले जनाएको छ।
गाँउपालिकाले पालिका भित्र उत्पादित रैथाने बाली कोदो र फापरको न्यूनतम समर्थन मूल्य पनि निर्धारण गरेको छ।
गाउँपालिकाको आर्थिक विकास समितिको निर्णयअनुसार चालु आथिएक वर्षका लागि कोदोको न्यूनतम समर्थन मूल्य प्रतिकेजी ५५ र फापर प्रति केजी १०० निर्धारण गरिएको छ ।
तपाईंको ईमेल गोप्य राखिनेछ ।