काठमाडौं : यो वर्ष दुईवटा रामनवमी परेको छ, पहिलो वैशाख ५ गते बुधबार, दोस्रो चैत २४ गते आइतबार । नेपाल सरकारले बैशाखको रामनवमीमा त सार्वजनिक बिदा दिएको छ, चैतकोमा छैन।
नेपाल सरकार गृह मन्त्रालयद्वारा गत माघ २८ गते प्रकाशित राजपत्रमा वैशाख ५ गतेको रामनवमीमा बिदा उल्लेख छ। चैत २४ गतेकोमा बिदा उल्लेख छैन।राजपत्रमा प्रकाशित सूचीअनुसार यो वर्ष २७ दिन पर्व बिदा दिइएको छ।
यसअघि पुस १२ गते बसेको मन्त्रिपरिषद् बैठकले सार्वजनिक बिदा २ दिन थप गर्ने निर्णय गरेको थियो। बैठकले शहीद दिवस र रामनवमीमा बिदा दिने निर्णय गरेको हो। सोहीअनुसार राजपत्र छापिएको हो।
एकै वर्ष किन पर्यो दुईवटा रामनवमी ?
नेपाल पञ्चाङ्ग निर्णायक विकास समितिका अध्यक्ष प्रा. श्रीकृष्ण अधिकारीका अनुसार अघिल्लो वर्ष परेको अधिकमासका कारण चैतेदशैँ र रामनवमी यो वर्षको वैशाखमा परेका हुन्।
उनका अनुसार अधिकमासकै कारण २०८० सालमा चैतेदशैँ र रामनवमी पर्व परेनन्। तिथि वर सर्दै आउँदा अर्को चैतेदशैँ र रामनवमी भने यही वर्ष चैत महिनामै परेका हुन्।
तपाईंको ईमेल गोप्य राखिनेछ ।