काठमाडौं : न्यून बिजकीकरणमार्फत हुँदै आएको राजस्व चुहावट नियन्त्रण गर्न अर्थ मन्त्रालयले भन्सार जाँचपासमा कडाइ गर्न थालेपछि व्यापारीले आयात गर्न ठिक्क पारेको सामान सीमापारि नै ‘होल्ड’ गर्न थालेका छन्।
अर्थ मन्त्रालयले बुधबार भन्सार विभागलाई पत्र लेखेर सन्दर्भ मूल्यभन्दा कममा भन्सार मूल्यांकन नगर्न निर्देशन दिएको थियो। मंगलबार अर्थमन्त्रीले मौखिक रूपमा दिएको निर्देशन बुधबारै भन्सार विभागले सबै भन्सार कार्यालयलाई जानकारी गराएको थियो। मन्त्रालयमा शुक्रबार बोलाइएको बैठकमा अर्थमन्त्रीले त्रिभुवन अन्तर्राष्ट्रिय विमानस्थल, भैरहवा, काँकडभिट्टा, विराटनगर, ड्राइपोर्ट, वीरगञ्जलगायत मुख्य भन्सार कार्यालयका प्रमुखलाई भन्सार छली नियन्त्रण गर्न निर्देशन दिएका थिए।
अर्थमन्त्रीको निर्देशनपछि सबैजसो भन्सार कार्यालयले जाँचपासमा कडाइ गरेका छन्। भन्सारमा भएको कडाइसँगै व्यवसायीले सीमापारि नै सामान रोक्न थालेका छन्। मोरङ व्यापार संघका अध्यक्ष पवनकुमार शारडाले भन्सारमा समस्या देखिएपछि आवश्यक सामान मात्र भन्सार छुटाउन थालेको बताए। उनले भने, ‘सरकारले विश्वास गरेन। राजस्व नपुगेपछि हाम्रो घाँटी निचोर्न थाल्यो। एक–दुई दिन अवस्था हेरेर के गर्ने भन्ने निर्णयमा पुग्छौं।’
वीरगञ्ज भन्सारमा बिहीबार ४१ करोड राजस्व उठेकोमा शनिबार १५ करोड मात्रै संकलन भएको छ। भन्सार कार्यालयका प्रवक्ता सन्तोष यादव नाकामा आयात गर्नेले सीमापार सामान ‘होल्ड’ गर्ने हल्ला सुनेको बताए। ‘वीरगञ्जमा यस्तो केही छैन। शनिबार होलीका कारण लेबर नभएर काम गर्न सकिएन। आठ सयभन्दा बढी गाडी यार्डमा छन्’, उनले भने, ‘सोमबार बेलुका मात्र व्यापारीले के गरे भनेर थाहा पाउन सकिन्छ।’
अर्थ मन्त्रालयका राजस्वसचिव शिशिरकुमार ढुंगाना व्यापारीले जहिले पनि तुलनात्मक लाभ खोज्ने गरेको बताए। उनले भने, ‘भन्सार जाँचपासमा कडाइ गरेपछि व्यापारी ‘वेट एण्ड सी’ को अवस्थामा छन्। जाँचपास पुरानै अवस्थामा फर्किन्छ कि भन्ने आसले सामान ल्याउन ढिलाइ गरेका हुन सक्छन्। माथिल्लो तहको प्रतिबद्धतासहित सुधारको कार्यक्रम अगाडि बढाइएकाले तलबाट केही होला भनेर आस नगरे हुन्छ।’
अर्थमन्त्रीले शुक्रबार निर्देशनका लागि बोलाएका भन्सार प्रमुखहरू शनिबार बेलुकासम्म कार्यक्षेत्र फर्किसकेका छन्। आइतबारबाट उनीहरूले निर्देशनको पूर्ण पालन गर्नेछन्। अहिलेलाई प्रतीतपत्रमा झिकाइएका सामानमा भन्सारमा शंकाको दृष्टिले हेरिने छैन। टेलिग्राफ ट्रान्सफर ९टीटी० र डिमान्ड ड्राफ्ट ९डीडी० मा आएका सामानलाई भन्सार मूल्यांकन कडा बनाइनेछ।
तपाईंको ईमेल गोप्य राखिनेछ ।