कोभिड-१९ {अपडेट}

दुई हजार एम्बुलेन्स तयारी अवस्थामा राख्ने सरकारकाे निर्णय

चैत २५, २०७६

    काठमाडौं : सरकारले कोभिड १९ रोगको रोकथाम र जोखिम नियन्त्रणका सन्दर्भमा मुलुकभरका एक हजार ९३९ एम्बुलेन्सलाई तयारी अवस्थामा राख्ने निर्णय गरेको छ।

    जिल्ला प्रशासन कार्यालय र एम्बुलेन्स सञ्चालक संस्थामार्फत कोभिड १९ नियन्त्रण र रोकथामका लागि उक्त संख्यामा एम्बुलेन्स तयारी अवस्थामा रहने गरी व्यवस्थापन गरिएको प्रधानमन्त्री तथा मन्त्रिपरिषद् कार्यालयका सचिव नारायणप्रसाद बिडारीले जानकारी दिए।

    नोभल कोरोना (कोभिड१९) रोगको संक्रमण, रोकथाम सम्बन्धमा उपप्रधानमन्त्री एवं रक्षामन्त्रीको संयोजकत्वमा गठित उच्चस्तरीय समन्वय समितिको आजको बैठकले यातायात आवागमनलाई कडाइ र निगरानी कायम राख्दै अत्यावश्यक खाद्यवस्तुको आपूर्ति व्यवस्थालाई नियमित गर्ने निर्णय गरेको छ।

    सरकारले जारी गरेको आदेशअनुरुप यातायात आवागमनलाई स्वाभाविक र सामान्य राख्ने निर्णय गरेको हो। प्रधानमन्त्री तथा मन्त्रिपरिषद्को कार्यालयमा मंगलबार बसेको उक्त बैठकले कोभिड–१९ नियन्त्रणका लागि चालेको कदमको समीक्षा गरेको थियो। यस रोग नियन्त्रण र रोकथामका लागि तत्काल आवश्यक पर्ने औषधि, स्वास्थ्य सामग्री प्रचलित कानुनको अधिनमा रही छोटो र छिटो विधिबाट खरिद प्रक्रिया अघि बढाएको छ।

    सरकार–सरकारबीचको समन्वयमा त्यस्ता सामग्री प्राप्त गर्न स्वास्थ तथा जनसंख्या मन्त्रालयको समन्वयमा आवश्यक संख्या र किसिम पहिचान गरी नेपाली सेनामार्फत प्रक्रिया अघि बढाइएको छ। सरकारले स्वास्थ्य सेवा विभागबाट प्रतिस्पर्धाका आधारमा ल्याउने सामग्रीका लागि प्रक्रिया कायम नै राख्ने व्यवस्था मिलाएको छ। विदेशस्थित कूटनीतिक नियोगबाट पनि त्यस्ता सामग्री सहयोग प्राप्तिका लागि पहल हुने छ।

    कोभिड–१९ को संक्रमणबाट मुलुकको जनजीवन र अर्थतन्त्रमा पर्ने असर मूल्यांकन गर्न राष्ट्रिय योजना आयोगलाई जिम्मेवारी दिने बैठकले निर्णय गरेको सचिव बिडारीले जानकारी दिए। सरकारले मुलुकमा हालको बन्दाबन्दी (लकडाउन) लाई दृष्टिगत गरी अन्तर्राष्ट्रिय उडान स्थगित अवधि यही अप्रिल ३० गतेसम्म कायम राख्ने निर्णय गरेको पनि उनले जानकारी दिए। यसअघि उक्त समय अप्रिल १५ सम्मका लागि घोषणा गरिएको थियो।

    बैठकले कोभिड १९ को रोकथाम, नियन्त्रण गर्ने सन्दर्भमा बढी प्रभावको शंका गरिएको कैलाली, कञ्चनपुर र बागलुङ जिल्लामा शंकास्पद व्यक्तिको द्रुतगतिमा स्वास्थ्य परीक्षणको व्यवस्था मिलाउने निर्णय गरेको छ। समितिले अन्य रोगको संक्रमण रहेको डोटी, अछाम र जुम्लामा स्वास्थ्य उपचारसम्बन्धी आवश्यक व्यवस्था मिलाउन सम्बन्धित निकायलाई निर्देशन दिएको छ।

    एक लाख १४ हजारभन्दा बढीलाई राहत 

    हालसम्म कोभिड १९ को जोखिम नियन्त्रणका लागि गरिएको लकडाउनको स्थितिले अप्ठेरोमा परेका एक लाख १४ हजार ३१६ जनालाई सरकारले दैनिक अत्यावश्यक खाद्यान्नसहितको राहत उपलब्ध गराएको पनि सचिव बिडारीले जानकारी दिए। बन्दाबन्दीको स्थितिपछि विभिन्न मुलुकबाट नेपाल आएकासमेत गरी ३० हजार ५०६ अहिले विभिन्न क्वारेन्टाइनमा रहेका जानकारी दिइएको छ। 

    आवागमनसम्बन्धी सरकारले जारी गरेको आदेशको अवज्ञा गर्ने  दुई हजार ६०० नागरिकलाई नियन्त्रणमा लिएर सचेत गराएको तथा आदेश उल्लंघन गरी चलाइएका दुई हजार २३५ सवारीसाधनलाई नियन्त्रणमा लिएर कारवाही गरिएको पनि उनले बताए।

तपाईको प्रतिक्रिया दिनुहोस्

यहाँको इमेललाई गोप्य राखिनेछ । अनिवार्य रुपमा दिनुपर्ने जानकारीहरुलाई ' * ' चिन्ह प्रयोग गरिएको छ ।

सामाजिक संजाल

सम्पर्क

थाहा खबर प्रा. लि.
सुमार्गी बी कम्प्लेक्स
बबरमहल- ११, काठमाडौं, नेपाल

इमेलः
समाचार विभाग: इमेल-thahakhabar16@gmail.com
फोन : ९७७-१- ४२६१९४१
बिज्ञापनः फोन- ९७७-१-४२६३४५४
९८५१०७६३३६(सञ्जय नेपाल)
इमेल: mkt.thahakhabar@gmail.com

हाम्रो बारेमा

प्रधान सम्पादक: तीर्थ कोइराला
सूचना विभाग दर्ता नं.: ७७८/२०७४-७५

[विस्तृत]