‘प्रमुख कारण तीव्र गति’

|

चितवन : बागमती प्रदेशको काठमाडौँ, भक्तपुर र ललितपुरबाहेक १० जिल्लामध्ये सबैभन्दा बढी सवारी दुर्घटना चितवनमा हुने गर्छ।

त्यसमा पनि ​पूर्वी चितवन क्षेत्रमा बढी दुर्घटना हुने गरेको छ। जिल्लामा यो आर्थिक वर्षको ६ महिनाभित्र भएका सवारी दुर्घटनामा ५८ जनाको मृत्यु भइसकेको छ।

जिल्ला ट्राफिक प्रहरी कार्यालय चितवनका अनुसार सवारी दुर्घटनाबाट साउनमा ८, भदौमा ३, असोजमा ९, कार्तिकमा १०, मंसिरमा १३ र पुसमा १५ जनाको मृत्यु भएको हो।

गत आर्थिक वर्ष ०७६/७७ को पहिलो ६ महिनामा दुर्घटनाबाट ९१ जनाको मृत्यु भएको थियो। चालु आर्थिक वर्षको पुष मसान्तसम्म दुर्घटना परेर मृत्यु हुनेहरूमा पुरुष ४८ जना, महिला ६ जना, बालक एक र बालिका तीन जना छन्।

तीव्र गतिमा सवारी चलाउँदा बढी दुर्घटना हुने गरेको जिल्ला ट्राफिक प्रहरी कार्यालय चितवनका प्रमुख प्रहरी निरीक्षक दयाकृष्ण भट्टले जानकारी दिए। अब भने तीव्र गतिका सवारीसाधनलाई 'लाइडर गन' को सहायतामा थप कडाइ गरी दुर्घटना नियन्त्रण गरिने उनले बताए। 

जिल्लामा चालू आर्थिक वर्षको पुष मसान्तसम्म २१६ वटा दुर्घटना भए। तीव्र गतिका कारण १६१ वटा दुर्घटना भएको हो। चालकको लापरबाहीले ३८, ओभर टेकका कारण १० वटा, मादक पदार्थ सेवन गरी सवारी चलाउँदा ७ र यात्रुको गल्ती र यान्त्रिक गडबढीका कारण १/१ वटा दुर्घटना भएको ट्राफिक प्रहरीको विश्लेषण छ।

छ महिनाको अवधिमा तीव्र गतिमा सवारी चलाउने एक हजार ७५ जनालाई लाइडर गन प्रयोग गरी ट्राफिक प्रहरीले कारबाही गरेको छ। 

‘गोन्द्राङदेखि भण्डारासम्मको राजमार्गमा तीव्र गतिमा सवारी चलाइन्छ’, ट्राफिक प्रमुख भट्ट भन्छन्, ‘यो सडक दुर्घटनाको जोखिमयुक्त क्षेत्र हो, यस सडकमा बढी दुर्घटना हुने गरेका छन्।’ लाइडर गनको सहायताले सवारीसाधनको गति मापन गर्ने गरिन्छ। तीव्र गतिमा सवारी चलाउनेलाई ५ सय देखि १ हजार रुपैयाँसम्म जरिवाना हुने उनले बताए। 

चितवनमा एउटामात्रै लाइडर गन छ। यसले तीव्र गतिका सवारीको गति मापन गर्ने, गाडी नम्बरसहित फोटो खिच्ने, अभिलेख राख्ने र प्रिन्टसमेत गर्ने गर्छ। एउटा लाइडर गनलाई १२ लाख रूपैयाँसम्म पर्छ। चितवनमा यसको थप आवश्यकता रहेको ट्राफिक प्रहरीले जनाएको छ।

मोटरसाइकल, कारलगायतका निजी सवारीको गति ५० किमी प्रतिघण्टा र हेभी सवारीको गति ४० किमी प्रतिघण्टा हुनुपर्छ। गति त्यो भन्दा माथि हुने सवारी चालकलाई कारबाही गरिने प्रहरीले बताएको छ।

साँझको समयमा बढी दुर्घटना

जिल्लामा साँझको समयमा बढी दुर्घटना हुने गरेको पाइएको छ। पुस मसान्तसम्म भएका २१६ वटा दुर्घटनामध्ये साँझ ६ बजेदेखि राति १२ बजेसम्म ८९ वटा दुर्घटना भएको ट्राफिक प्रहरीको तथ्यांक छ।

त्यसपछि राति १२ बजेदेखि बिहान ६ बजेसम्म २० वटा, बिहान ६ बजेदेखि दिउँसो १२ बजेसम्म ३६ वटा र दिउँसो १२ बजेदेखि साँझ ६ बजेसम्म ७१ वटा दुर्घटना भएको ट्राफिक प्रमुख भट्टले बताए। 

२१६ वटा दुर्घटनामा ३३६ वटा सवारी साधन संलग्न देखिए, जसमा मोटरसाइकलमात्रै १६३ वटा छन्। दुर्घटनामा ट्रक/ट्यांकर ५४ वटा, जीप/कार ४५ वटा, बस २० वटा, ट्याक्टर र टेम्पो १२/१२ वटा, टिपर ६ वटा, माइक्रो ३ वटा र शारिरिक शक्तिबाट चल्ने १९ वटा सवारी संलग्न रहेको देखिएका छन्।

एक करोड ६१ लाख राजस्व संकलन

जिल्ला ट्राफिक प्रहरी कार्यालय चितवनले चालु आर्थिक वर्षको ६ महिनामा एक करोड ६१ लाख २६ हजार रुपैयाँ राजस्व संकलन गरेको छ।

यो अवधिमा ट्राफिक नियम उल्लघंन गर्ने १९ हजार ९ सय सवारी कारबाहीमा परेको ट्राफिक प्रमुख भट्टले बताए। पुस महिनामा मात्रै ४ हजार ४ सय सवारीलाई कारबाही गरी ४४ लाख ४४ हजार ५०० रुपैयाँ राजस्व संकलन गरेको छ।

सम्वन्धित समाचार

तपाईको प्रतिक्रिया दिनुहोस्

तपाईंको ईमेल गोप्य राखिनेछ ।
This site is protected by reCAPTCHA and the Google Privacy Policy and Terms of Service apply.