म्याग्दी : बेनी नगरपालिका–४ मा पर्ने सिंगा र तातोपानी क्षेत्र कोरोना संक्रमणको केन्द्र बनेको छ। तातोपानी कुण्ड स्नानका लागि आएका पाहुनामार्फत भित्रिएको कोरोना भोजभतेर र जमघटबाट टोल बस्ती हुँदै नागरिकका घरसम्म पुगेको छ।
सिंगाका वडाध्यक्ष गोविन्द पौडेलका अनुसार वडाभर हालसम्म ६५ भन्दा बढी संक्रमित भइसकेका छन् भने दुई जनाको मृत्यु भइसकेको छ। स्वास्थ्य कार्यालय र प्रदेशको स्वास्थ्य निर्देशनालयले सोमबार सार्वजनिक गरेको बेनी नगरपालिकाका ५१ जना सबै संक्रमित वडा नम्बर ४ का हुन्। वैशाख २७ गते नगरपालिकाका स्वास्थ्यकर्मीहरुले लक्षण देखिएका र संक्रमितको नजिकको सम्पर्कमा रहेका ६७ जनाको सिंगामा स्वाब संकलन गरेका थिए।
‘तातोपानी, सिंगा, बास्कुना, थामडाँडा, डाँडाखेत र सुर्केमेलामा बढी संक्रमित छन्। कतिले अझै परीक्षण गरेका छैनन्’, वडाध्यक्ष पौडेलले भने, ‘छुटेका र संक्रमितको सम्पर्कमा रहेका व्यक्तिहरुको मंगलबार पुनः तातोपानीमा स्वाब संकलन गर्दैछौं।’
गत वैशाख १४ गते तातोपानीका होटल व्यवसायीहरुलाई कोरोनाको लक्षण देखिएको थियो। वडाध्यक्ष पौडेलका अनुसार यसअघि बेनी नगरपालिकाको वडा नम्ब ४ मा १६ संक्रमित थिए। जिल्ला प्रशासन कार्यालयले म्याग्दीका तातोपानी कुण्ड बन्द गराउन निर्देशन दिनुभन्दा अघिदेखि नै तातोपानीमा भित्रिएको कोरोना फैलिने क्रममा थियो।
तातोपानीको छिमेकी बस्ती सिंगा, सुर्केमेला, डाँडाखेत, बास्कुना र थामडाँडामा १४ गतेपछि चौरासी पूजा, विवाह, क्रिया कर्म, व्रतबन्ध जस्ता सांस्कृतिक कार्य भए र त्यहाँ भोजभतेर र जमघट भएको थियो। नागरिकहरु सचेत भइसकेका थिएनन्। मास्क, स्यानिटाइजरको प्रयोग र हात धुने अभ्यासप्रति ध्यान दिएनन्। प्रशासनले प्रतिबन्ध लगाए पनि सांस्कृतिक कार्यमा बाजागाजा, नाचगान र भोजभतेर चल्यो।
तातोपानी स्नान र भ्रमणमा आएका शहरी क्षेत्रका पाहुनामार्फत भित्रिएको कोरोना समुदायस्तरमा फैलाउन सांस्कृतिक कार्यले सहयोग पुगेको ठहर जिल्लास्थित सुरक्षा निकाय, जनप्रतिनिधि, प्रशासन र सरोकारवालाले गरेका छन्। फैलिएको कोरोना नियन्त्रण गर्न सिंगा, तातोपानीलगायतका बस्तीका बासिन्दाहरु घरभित्रै बसेका छन्।
तातोपानीको उपल्लो र तल्लो बजार सोमबार दिउँसो सुनसान थियो। पसल तथा होटल बन्द थिए। मानिसहरु झ्यालबाट बाहिर हेरिरहेका थिए। उनीहरु कोरोनादेखि डराएको जस्तो वातावरण थियो। लक्षण देखिएका र सम्पर्कमा रहेकाहरुको स्वाब परीक्षण, उपचारका साथै थप फैलिन नदिन सचेतनामूलक कार्यक्रम गरिएको वडाध्यक्ष पौडेलले बताए। उनले स्वास्थ्यकर्मीसहितको टोली संक्रमितको घरमा पुगेर अवस्था बुझ्ने र हौसला दिन थालिएको बताए।
यसैबीच बेनी नगरपालिकाका ५१ सहित म्याग्दीमा सोमबार ८२ नयाँ संक्रमित थपिँदा ५३ जनाले कोरोना जितेको स्वास्थ्य कार्यालयले जनाएको छ।
स्वास्थ्य कार्यालयका निमित्त प्रमुख एकनारायण लम्सालले पिसिआर विधिबाट गरिएको परीक्षणका क्रममा रघुगङ्गामा थप ११ संक्रमित भेटिएका छन्। चौध जनाको पिसिआर परीक्षण गरिएको थियो। उनीहरु सबै वडा नम्बर ४ का हुन्। रघुगङ्गाको वडा नम्बर ४ मा पर्ने दग्नाममा वैशाख तेस्रो साता भूमे पूजा भएको थियो।
एन्टिजेन परीक्षणबाट रघुगङ्गामा तीन, धवलागिरिमा १४, मङ्गलामा दुई र अन्नपूर्णमा एक जनामा कोरोना पुष्टि भएको स्वास्थ्य कार्यालयका निमित्त प्रमुख लम्सालले बताए। धवलागिरिका संक्रमित वडा नम्बर २ लुलाङ र लम्सुङका हुन्।
हालसम्म ९६७ संक्रमित रहेको म्याग्दीमा सक्रिय संक्रमितको संख्या ४४४ जना छ। म्याग्दीबाट पठाइएको ४१६ वटा स्वाब नमूनाको नतिजा आउन बाँकी छ। वैशाख २२ गते रातिदेखि शुरु भएको निषेधाज्ञा जेठ १० गतेसम्म लम्बिएको छ।
परीक्षणको दायरा बढाए पनि पिसिआरको नतिजा आउन ढिलाइ हुँदा जोखिम र कोरोना नियन्त्रणमा चुनौती छ। स्थानीय तहस्तरमा आइसोलेशन सञ्चालन गरेका स्थानीय तहका जनप्रतिनिधि र स्वास्थ्यकर्मीहरु लक्षण देखिएकाको परीक्षणका साथै होम आइसोलेशनमा बसेकालाई भेटेर हौसला बढाउने र रोग प्रतिरोधात्मक क्षमता बढाउने औषधि वितरण गरिरहेका छन्।
बेनी अस्पतालमा सञ्चालित आइसोलेशनमा बिरामीको चाप बढेको छ। सोमबार केही समय अस्पताल परिसरमा संक्रमितलाई राखेर उपचार गर्ने ठाउँको अभाव भएको थियो। पोखरा पठाएको सिलिण्डर भरेर आउन ढिलाइ हुँदा अक्सिजन अभाव हुने चिन्ताले चिकित्सक, स्वास्थ्यकर्मी र व्यवस्थापन समितिका पदाधिकारी चिन्तित देखिन्थे।
बेनी अस्पतालको आइसोलेशनमा नौ पुरुष र सात महिला उपचाररत छन्। तीन जना निको भएर घर गएका छन्। उन्नाइस जनाको पिसिआर परीक्षणका लागि स्वाब सङ्कलन गरेको अस्पतालमा १२ को एन्टिजेन परीक्षण गर्दा नौमा संक्रमण पुष्टि भएको छ। एन्टिजेन नेगेटिभ आए पनि चार जनालाई निगरानीमा राखेर उपचार गरिएको छ।
तपाईंको ईमेल गोप्य राखिनेछ ।