काठमाडौं : बागमती प्रदेश सरकारले सार्वजनिक यातायातको भाडा समायोजन गरी वृद्धि गरेकामा उपभोक्ताले आपत्ति जनाएका छन्।
चाडबाड मुखमा आम उपभोक्ताको ढाड सेक्ने गरी बिनाआधार भाडा वृद्धि गरिएको ललितपुर महानगरपालिका–१० का स्थानीयवासी श्याम महर्जनले गुनासो गरे। सरकारले वैज्ञानिक भाडादर लागु गरेको भनिए पनि यातायात व्यवसायीको इच्छामा भाडा वृद्धि हुने गरेको उनले आरोप लगाए।
भौतिक पूर्वाधार विकास मन्त्रालयले आगामी कात्तिक १ देखि लागु हुने जनाउँदै दशैंअघि नै भाडा बढाएको हो। कात्तिक १ गतेदेखि लागु हुने भनिए पनि बुधबार भाडा बढाएका आधारमा बिहीबारदेखि नै सार्वजनिक यातायातमा भाडा असुली हुन थालेको छ। २३ प्रतिशतसम्म भाडा वृद्धि भएको प्रदेश सरकारले विज्ञप्तिमार्फत सार्वजनिक गरे पनि व्यवसायीले भने सके जति भाडा असुलेको यात्रु रमेश पुडासैनीले बताए। प्रदेश सरकारले भाडा वृद्धि गर्ने तर अनुगमन भने नगर्ने गैरजिम्मेवार काम गरेको उनको गुनासो छ।
प्रदेश सरकारले कात्तिक १ गतेदेखि लागू गर्ने जनाउँदै असोज २० मा २३ प्रतिशतसम्म भाडा वृद्धि गरेको हो। व्यवसायीको इच्छामा भाडा वृद्धि गरेकाले खारेज गरिनुपर्ने यात्रु इन्द्रमाया तामाङले बताइन्। गत असार २७ गते अन्तर प्रदेशको भाडा वृद्धि गरिएको थियो। प्रदेशभित्र भाडा वृद्धि गर्ने अधिकार भने नयाँ संरचना अनुसार प्रदेश सरकारलाई दिइएको छ।
प्रदेश १ सरकारले यसअघि नै भाडा समायोजन गरेको छ। अन्य प्रदेशमा सार्वजनिक यातायातको भाडा समायोजन गरिएको छैन। उपभोक्ता मञ्चका केन्द्रीय सदस्य रोशन पोखरेलले सार्वजनिक यातायातको क्षेत्रमा वृद्धि गरिएको भाडादर फिर्ता लिन माग गरे।
तपाईंको ईमेल गोप्य राखिनेछ ।