विराटनगर : सभामुख प्रदिपकुमार भण्डारीले संविधान र आफ्नै नियमावली च्यातेर आफ्नो असली चरित्र उदाङ्गो पारेको नेकपा माओवादी केन्द्र प्रदेश १ का संसदीय दलका नेता इन्द्रबहादुर आङबोले बताएका छन्।
पूर्व अर्थमन्त्रीसमेत रहेका आङबोले सामाजिक सञ्जाल फेसबुकमा प्रतिक्रिया दिँदै यस्तो बताएका हुन्।
उनले भनेका छन्, 'एमाले संसदीय दलको निर्णयलाई कार्यान्वयन गर्दै सभामुखज्यूले भोलि १ बजे बोलाइएको प्रदेशसभा बैठक सूचना टाँसेर कार्तिक ५ गते बोलाउनु भयो, हामीले ध्यानाकर्षण गराउँदा गराउँदै पनि सभामुखले तटस्थता र निष्पक्षता होइन पक्षधरता जनाउँदै संविधान र आफ्नै नियमावली च्यातेर आफ्नो असली चरित्र उदाङ्गो पार्नुभएको छ।'
उनले थपेका छन्, 'यी सबै परिघटनाको समीक्षा र मूल्यांकन इतिहास र भविष्यले गर्ने नै छ, तपाईंको आगामी दिन यस्तै रहोस् बधाई छ सभामुखज्यू।'
प्रदेश १ का मुख्यमन्त्री भीम आचार्यले असोज २५ गतेभित्र विश्वासको मत लिनुपर्ने प्रतिपक्षी दलहरूले बताएका थिए।
तर मुख्यमन्त्री आचार्यले दशैंपछि मात्रै विश्वासको मत लिने बताउँदै आएका थिए।
तपाईंको ईमेल गोप्य राखिनेछ ।