काठमाडौँ : नेपाली यू–१६ महिला टोलीले घरेलु मैदानमा हुने साफ यू–१६ महिला फुटबल च्याम्पियनसिपमा उत्कृष्ट प्रदर्शन गर्ने विश्वास लिएको छ।
अखिल नेपाल फुटबल संघ (एन्फा) को आयोजनामा शुक्रवारदेखि आगामी फागुन २७ सम्म प्रतियोगिता हुँदै छ। नेपालसहित ४ राष्ट्रले प्रतिष्पर्धा गर्नेछन्। बिहीवारदेखि प्रतिष्पर्धा शुरु हुने भए पनि नेपालले भने आफ्नो पहिलो खेल बलियो टोली बंगलादेशसँग खेल्दै छ।
नेपाली युथ टोलीका प्रशिक्षक चक्र तामाङले एक महिनाको तयारीमा राम्रो टोली बनेको उल्लेख गर्दै घरेलु मैदानमा उत्कृष्ट प्रदर्शन गर्ने विश्वास लिएका हुन्। नेपालको सिनियर टोली पहिलो पटक महिला फुटबलमा उपाधि भित्र्याउने योजनामा छ।
साउदी अरेबियामा नेपालको सिनियर राष्ट्रिय महिला टोलीले बिहीवार राति नै जोर्डनसँग फाइनल खेल्दै छ। सिनियरको प्रदर्शनबाट उत्साहित युवा टोली सोही पथ पछ्याउने आशामा छन्।
महिला यू–१६ टोलीकी कप्तान भूमिका बुढाथोकीले आफ्नो टोली बलियो रहेको र प्रतियोगितामा चुनौती प्रस्तुत गर्ने बताइन्। आफ्ना सिनियरहरुले राम्रो गरिरहेको उल्लेख गर्दै आफूहरू पनि सोही किसिमको प्रदर्शन गर्ने विश्वास व्यक्त गरिन्।
नेपालले सन् २०२२ मा साफ यू–१५ च्याम्पियनसिप जितेको थियो। त्यतिबेला भूमिका पनि टोलीकी सदस्य थिइन्।
नेपालका प्रशिक्षक चक्र तामाङले पनि सिनियर दिदीहरूको सफलताले आफ्नो टोलीलाई उत्प्रेरणा मिलेको विश्वास व्यक्त गरे। यही मैदानमा लामो समयदेखि प्रशिक्षण भइरहेकाले पनि त्यसको फाइदा लिने उनको भनाइ छ।
यसअघि प्रतियोगिता च्यासल मैदानमा आयोजना गरिने बताइएको थियो तर अन्तिम समयमा आएर सातदोबाटोस्थित एन्फा कम्प्लेक्समा सारिएको छ। एएफसी र साफको प्राविधिक टोलीले निरीक्षण गरेपछि च्यासलमा खेल गर्न नमिल्ने देखिएकाले आयोजनास्थल एन्फा कम्प्लेक्समा सारिएको हो।
बंगलादेशका प्रशिक्षक साइफुल बरी तितुले आफ्नो टोली एकेडेमीका खेलाडी नभएकाले केही चुनौती रहने उल्लेख गरे। महिला फुटबलमा बंगलादेशले राम्रो नतिजा निकालिरहेको र अहिले सोही किसिमको नतिजा प्राप्त गर्न दबाब सिर्जना नगर्ने पनि प्रशिक्षक तितुको भनाइ छ।
भूटानका प्रशिक्षक खान्डु त्सोमोले यो उमेर समूहका प्रतियोगितामा एकअर्कालाई राम्रो बुझ्न गाह्रो हुने उल्लेख गरे। साथै शारीरिक रूपमा केही चुनौती हुने भए पनि मानसिक रूपमा सबै तयार रहेको भूटानको टोलीको भनाइ छ।
यो प्रतियोगिताका लागि भारतले दुई महिनादेखि तयारी गरेको छ। भारतका प्रशिक्षक बिबी थोमसले साफको प्रतियोगिताका लागि मात्र आफूहरू सीमित नरहेको उल्लेख गर्दै भारतको समग्र फुटबल विकासका लागि काम गरिरहेको बताए। भारतका सबै टोली टेक्निक र ट्याक्टिकल रूपमा राम्रो गर्ने विश्वास व्यक्त गरे।
यस प्रतियोगिताको टिकट दर साधारणतर्फ १०० र भिआइपी पारापिटतर्फ ३०० रुपैयाँ तोकिएको छ। खेलको टिकट एन्फा कम्प्लेक्स सातदोबाटोमा भौतिक रुपमा किन्न पाइनेछ।
यो प्रतियोगिताको लागि चक्र तामाङको प्रशिक्षणमा २३ सदस्यीय नेपाली यू–१६ महिला टोलीले तयारी गरिरहेको छ। प्रतियोगिताको उद्घाटन खेल १८ फागुनमा भारत र भुटानबीच हुनेछ। ४ टोलीले एकअर्कासँग प्रतिष्पर्धा गरेपछि शीर्ष २ टोलीले फाइनल खेल्नेछन्।
तपाईंको ईमेल गोप्य राखिनेछ ।