काठमाडौं : मेडिकल कलेजका सञ्चालक सुनिल शर्मालाई नेकपा (एकीकृत समाजवादी) निकट विद्यार्थी संगठन अनेरास्ववियुका विद्यार्थीहरूले मोसो दलेका छन्।
शिक्षामन्त्री देवेन्द्र पौडेलले आज आयोजना गरेको छलफल लगत्तै विद्यार्थीहरूले मन्त्रालयमै दुर्व्यवहार गरेका हुन्। अतिरिक्त शुल्क लिएको भन्दै एमबिबिएसमा अध्ययनरत विद्यार्थीहरू लामो समयदेखि आन्दोलनरत छन्।
शर्माले आन्दोलनरत विद्यार्थीलाई अभद्र व्यवहार गरेको दावी गर्दै आफूहरूले मोसो दलेको अनेरास्ववियुका अध्यक्ष सुदेश पराजुलीले स्वीकार गरे।
उनले थाहाखबरलाई भने, ‘अनेरास्ववियुले यिनलाई मोसो लगाएको हो। यिनले नोबेल कलेजका हाम्रा साथीहरूलाई गुण्डाहरू लगाएर कुटपिट गर्ने हर्कत गरेका थिए’, पराजुलीले अझै थपे, ‘यिनको बाटो मेडिकल शिक्षामा अँध्यारो छ, त्यसैले मोसो लगाइदिएका हौं।’
उनले अनेरास्ववियुका उपमहासचिव महेश श्रेष्ठ र स्थायी कमिटी सदस्य अमर पुनलाई नियन्त्रणमा लिएको जानकारी दिए।
काठमाडौं मेडिकल कलेज र विराटनगरस्थित नोबेल कलेजले एमबिबिएसका विद्यार्थीहरूसँग अतिरिक्त शुल्क लिएको विरोधमा विभिन्न विद्यार्थी संगठनहरूसहित पीडित विद्यार्थी एक महिनादेखि आन्दोलनरत छन्। आन्दोलनरत पक्ष र कलेज बिच शिक्षा मन्त्रालयमा वार्ताका लागि शर्मा त्यहाँ पुगेका थिए।
तपाईंको ईमेल गोप्य राखिनेछ ।