तनहुँ : सदरमुकामस्थित दमौली अस्पतालमा रहेको मिर्गौला उपचार केन्द्रमा रगत अभाव हुँदा मिर्गौला पीडितलाई डायलासिसका लागि समस्या भएको छ।
कोरोना कहर र निषेधाज्ञाका कारण जिल्लामा रक्तदानका कार्यक्रम नहुँदा रगत अभाव भएकाले डायलासिस गर्नुपर्ने मिर्गौला पीडित मारमा परेका हुन्। नियमित रूपमा डायलासिस गराउँदै आएका मिर्गौलापीडित रगत खोज्न आफैँ हिँड्नुपर्ने अवस्था आएको छ।
मिर्गौला उपचार केन्द्रका इन्चार्ज शैलेन्द्र पण्डितले निषेधाज्ञाका कारण रक्तदान नहुँदा उपचार केन्द्रमा रगत अभाव भएको जानकारी दिए। 'पहिला पहिला नियमित रक्तदान हुँदा समस्या हुन्थेन, अहिले रगत अभाव भएपछि समस्या भएको छ,' उनले भने, 'मिर्गौला पीडित आफैँले रगत खोज्नुपर्ने अवस्था आएको छ।'
कतिपय मिर्गौला पीडितले पोखरासम्म पुगेर रगत ल्याउने गरेका छन् भने कतिपयले आफन्त वा चिनेजानेका व्यक्तिलाई रक्तदानका लागि ल्याउने गरेका छन्।
'दमौलीमै भएका आफन्त वा साथीभाई आएर पनि रक्तदान गरिदिनुहुन्छ, कोही नपाएको खण्डमा भने पोखरा पुगेरै रगत ल्याउनुपर्ने बाध्यता छ,' पण्डितले भने।
व्यास नगरपालिका–४ का अब्दुल गफ्फार मियाले रगत अभाव हुँदा आफूहरूलाई समस्या परेको बताए। 'निषेधाज्ञा अगाडि त समस्या थिएन, तर अहिले निषेधाज्ञा भएपछि समस्या पर्यो,' उनले भने।
केन्द्रमा हाल दैनिक ६३ जनाले डायलासिस गराइरहेका छन्। विसं २०७२ साल मङ्सिर ३ गते देशभरका जिल्ला अस्पतालमध्ये दमौली अस्पतालमा पहिलो पटक डायलासिस केन्द्र स्थापना भएको थियो।
केन्द्रले हालसम्म २५ हजारभन्दा बढी पटक डायलासिस सेवा प्रदान गरेको छ। केन्द्रमा नौ वटा डायलासिस गराउने उपकरण रहेको छ।
तपाईंको ईमेल गोप्य राखिनेछ ।