हेर तिमी र ममा फरक कति छ कति छ
तिमीलाई केवल आफू मात्र आफू बन्नु छ
मलाई तिमी, ऊ अनि सके आफू बन्नु छ
त्यसैले भन्छु तिमीलाई म बन्न धेरै गार्हो छ ।
तिमी गुलावको फूलमा त काँडा छ भन्छौ
म काँडाको बीचमा त गुलाव फूल्छ भन्छु
तिमी कमल कस्तो हिलोमा फूल्यो भन्छौ
म हिलोमा कमल कति राम्रो फूल्यो भन्छु ।
तिमी मेरो अनुहारको हासो मात्र देख्छौ
म तिम्रो हासोभित्रको पीडा पनि देख्छु
तिमी मबाट केही पाउँदा खुसी हुन्छौ
म तिमीलाई केही दिन सक्दा खुसी हुन्छु ।
मलाई तिमी बन्न फेदैबाट उक्लिनुपर्छ
तिमीलाई म बन्न टुप्पोबाट झर्नुपर्छ
तिमी खहरे हुँदा म खोला भई बग्नुपर्छ
हामी एकै बन्न सागरमा गई मिल्नुपर्छ ।
बिडम्बना तिमी कोलाहलमा विश्वास गर्छौ
म शान्तिसँग समाधान खोज्दै अघि बढ्छु
हुन सक्छ तिम्रो उसको नजरमा म गलत छु
एकदिन समयले भन्छ बास्तवमा को गलत छ ।
त्यसैले फरक छ हामीबीच धेरै फरक छ
तिमीले नदेखेको मेरो भोगाई गराई अलग छ
मैले लुकाई राखेको गहिरो इतिहास पृथक् छ
किनकि हाम्रा सोच विचार धेरै धेरै फरक छ ।
तपाईंको ईमेल गोप्य राखिनेछ ।