सोलुखुम्बु : शरद ऋतुमा सगरमाथा आरोहण गर्न ५ जना पर्वतारोहीले अनुमति लिएका छन्।
सगरमाथा आरोहणका लागि एउटा समूहका ५ जनाले आरोहण अनुमति लिएको पर्यटन विभागले जनाएको छ। बढी हिउँ पर्ने भएकाले शरदमा सगरमाथा आरोहणका लागि उपयुक्त सिजन मानिँदैन।
विभागले शरद ऋतुमा देशका ४१ हिमाल आरोहण गर्न विभिन्न ७७ देशका १ हजार २३८ आरोहीलाई अनुमति दिएको छ। तीमध्ये अधिकांश पर्वतारोही गोरखास्थित मनास्लु हिमाल आरोहणका लागि जाँदै छन्।
कात्तिक ६ गतेसम्म मनास्लु आरोहणका लागि ४०४ जनाले अनुमति लिइसकेका छन्। दोस्रोमा आमादब्लम हिमाल रहेको छ। यस हिमालका लागि २६ टोलीका ३३६ जनाले अनुमति लिएको विभागले जनाएको छ। हिमलुङ हिमाल आरोहणका लागि १५६ जना पर्वतारोहीले अनुमति लिएका छन्।
विश्वकै सर्वोच्च शिखर सगरमाथा आरोहण गर्न सबैभन्दा थोरै अर्थात ५ जनाले मात्रै अनुमति लिएका छन्। अमेरिकाका ११५ जना, फ्रान्सका १०८ जना, बेलायतका १०३ जना, जर्मनीका ७७ जना र स्पेनका ७५ जना आरोहीले आरोहणको अनुमति लिएका छन्।
तपाईंको ईमेल गोप्य राखिनेछ ।