काठमाडौं : सिन्धुली सुनकोशी–३ का राजन गिरीप्रतिष्ठित कम्पनीमा कम्तीमा एक लाख रुपियाँ पाउने प्रलोभन देखाएर राजकुमार (नाम परिवर्तन) सँग दुई लाख रुपियाँ लिएर सम्पर्कबिहीन बने।
वैदेशिक रोजगारीमा साइप्रस पठाइदिने भन्दै ठगी गरेको आरोपमा उनलाई काठमाडौं उपत्यका अपराध अनुसन्धान कार्यालयले आइतबार पक्राउ गर्यो।
बिहीबारको गोरखापत्र दैनिकमा समाचार छ, गैरकानुनी बाटोबाटै साइप्रस पुग्ने सपना बोकेका राजकुमारलाई साइप्रस जान के के आवश्यक कागजपत्र चाहिन्छ भन्नेसम्म पत्तो छैन।
यति मात्र होइन साइप्रस, क्रोएसिया र पोल्याण्डमा मासिक दुई लाख रुपैयाँभन्दा बढी आम्दानी हुने काममा लगाइदिने प्रभोलनमा पारेर तीन युवासँग जनही छदेखि आठ लाख रुपैयाँसम्म असुल गरियो। काठमाडौँ उपत्यका अपराध अनुसन्धान कार्यालयको टोलीले सो घटनामा संलग्न सुनसरी बराहक्षेत्र–७ का मौसम मग्राती, सिन्धुपाल्चोक त्रिपुरा सुन्दरी–५ का अनन्त प्रकाश श्रेष्ठ र उदयपुर ताप्ली–४ का प्रचलन राईलाई यही साउन ११ गते नियन्त्रणमा लियो। प्रहरीले श्रेष्ठलाई जोरपाटीबाट, मग्रातीलाई काँडाघारीबाट र राईलाई ललितपुरको नखिपोटबाट नियन्त्रणमा लिएको हो।
अर्को घटनामा माल्टामा मासिक दुई लाख रुपैयाँको जागिर लगाइदिने प्रलोभन देखाएर पीडितसँग नौ लाख ठगी गरी फरार रहेका मुगु छायानाथ रारा–३ का प्रवीन खड्का गत जेठ २८ गते कुलेश्वरबाट पक्राउ परे। सोही दिन उदयपुर चौदण्डीगढी–७, बेलटारकी सुनिता न्यौपाने श्रेष्ठलाई प्रहरीले पुल्चोकबाट पक्राउ गर्यो। अमेरिका पठाएर मोबाइल सफ्टवेयर कम्पनीमा मासिक तीन लाख रुपैयाँ आम्दानी हुने जागिर लगाइदिने प्रलोभन देखाएर सुनिताले पीडितसँग छ लाख २१ हजार रुपियाँ ठगी गरेको उजुरीपछि प्रहरीले उनलाई पक्राउ गरेको हो।
यी केही प्रतिनिधि घटना मात्र हुन्। वैदेशिक रोजगारीको प्रलोभन देखाएर ठगी गर्ने घटना पछिल्लो समय बढेका छन्। काठमाडौँ उपत्यकामा मात्र एक वर्षमा वैदेशिक रोजगारीका नाममा ठगी गर्ने २२० जनाविरुद्ध पक्राउ पुर्जी जारी गरी ८१ जनालाई नियन्त्रणमा लिइएको छ। पक्राउ पर्नेमा ६४ पुरुष र १६ जना महिला छन्। अपराध अनुसन्धान कार्यालयले पक्राउ परेका ८१ जनाविरुद्ध २२ करोड २२ लाख ८७ हजार बिगो माग गरी अदालतमा मुद्दा दर्ता गरेको छ।
अपराध अनुसन्धान कार्यालयको टोलीले उपत्यका बाहिरबाट थप ६ पुरुष र एक महिलालाई नियन्त्रणमा लिई मुद्दा चलाएको छ। वैदेशिक रोजगारका नाममा ठगीका घटना बढ्न थालेपछि काठमाडौँ उपत्यका अपराध अनुसन्धान कार्यालयले अनुसन्धान र कारबाहीलाई तीव्रता दिन वैदेशिक रोजगारी ठगी अनुसन्धानका लागि एकाइ नै खडा गरेको छ।
अपराध अनुसन्धान कार्यालयका प्रहरी वरिष्ठ उपरीक्षक डा. मनोज केसीले वैदेशिक रोजगारी ठगीमा विभिन्न समूहमा गिरोह सक्रिय रहेकाले सो एकाइले उनीहरूमा निगरानी बढाएको जानकारी दिए। ‘अमेरिका, युरोपमा पठाउने भने पनि तत्काल रकम बुझाउन तयार हुने तर ती देशमा जान आवश्यक कागजपत्र र प्रक्रिया नै नबुझी ठगिनेको सङ्ख्या उल्लेख्य छ’, उनले भने।
तपाईंको ईमेल गोप्य राखिनेछ ।