बागलुङ : एक दशकअगाडिसम्म बागलुङको माथिल्लो खर्क तथा बुकी क्षेत्र भेडाबाख्रा र गाईभैँसीले भरिन्थे। एकै परिवारले १०० देखि हजार बढी पशुचौपाया पाल्ने चलन थियो। गाउँमा जनशक्ति प्रशस्तै थिए।
पछिल्लो समय बुढापाका र बालबालिकाबाहेक युवा शक्ति भेट्याउनै मुस्किल पर्छ। भेडाबाख्राको बथानले भरिने खर्क अहिले उराठलाग्दो बनेका छन्।
खास गरी बागलुङको निसीखोला, ढोरपाटन र ताराखोलाका नागरिकको मुख्य पेशा पशुपालन थियो। युवा शक्ति विदेश पलायन र बजार झर्न थालेपछि पाका पुस्ताले नै पशुपालन पेशा धान्दै आएका छन्। हरेक वर्ष भेडापालन गर्ने किसान घटेका छन्। भेडाबाख्रा पालेरै परिवार धान्नेहरुलाई बुढेसकालले छोयो। नयाँ पुस्ताले बजार रोजेपछि परम्परागत पेशा नै धरापमा पर्ने चिन्ता पुराना पुस्तालाई छ।
तमानखोला गाउँपालिका–५ खुङ्खानीका रनबहादुर सिर्पालीले भेडापालन गर्न थालेको ६५ वर्ष बित्यो। ७३ वर्षको उमेरमा पनि उनले २५० भन्दा बढी भेडाबाख्रा पालेका छन्। बाउबाजेबाट सिकेको पेशालाई उनलेले अझै निरन्तरता दिँदै आएका छन्।
१५ वर्षअगाडि गाउँमा ४० घरपरिवार भेडापालनमा आबद्ध भए पनि अहिले पाँच–सात घर मात्रै यो पेशामा रहेको उहाँको भनाइ छ। अधिकांश स्थानीयले पशुपाल्दा चरनका लागि सोलेडाँडा हुँदै, म्याग्दी, सैलुङ धवलागिरि हिमालको काखसम्म पुग्ने गरेको सुनाउँदै अचेल धेरै टाढा पुग्न नपर्ने सिर्पाली सुनाउँछन्। घरै अगाडि मोटर गाडी गुड्न थालेपछि स्थानीय घाँस दाउरा गर्न जंगल जानुको सट्टा बजार झर्ने गरेको उनको भनाइ छ।
‘हामीहरु गोठमै जन्म्यौँ। गोठमै हुर्कियौँ। गोठमै काम गर्दै आएका छौँ। हाम्रो पालामा पनि लाहुर जाने भन्ने चलन थियो, तर गइएन। आफ्नो गाउँ छोड्न सकिएन, वर्षौंदेखि पाल्दै आएका वस्तुभाउ छोड्न सकिएन। अहिलेसम्म पनि हामी पशुकै अघिपछि लेकबेँसी गरिरहेका छौँ’, सिर्पालीले भने, ‘हामीभन्दा पाका मान्छे बितिसके। हामीपछिका गाउँमा कम बस्छन्। हाम्रै दौँतरी मात्रै भेडाबाख्रा पाल्ने गरेका छन्। युवा बजारमै बस्न खोज्छन्। विदेश जान्छन्। पाँचसात साल आउँदैनन्। आए पनि वन जङ्गलमा गएर भेडाबाख्रा पाल्दैनन्। हाम्रो मृत्युपछि गाउँमा भेडाबाख्रा पाल्ने मान्छे नै हुने छैनन्।’
ढोरपाटन नगरपालिका–९ का बुधबहादुर बिक पनि ४२ वर्षदेखि भेडाबाख्रापालन गरिरहेका छन्। वेलावेला बिरामी हुने गर्दा अहिले ज्यानले त्यति साथ दिएको छैन। १५० भेडाबाख्रा पाल्दै आएकोमा अहिले ५० को हाराहारीमा मात्रै छन्। १० वर्षपहिले करिब ३० घरका छिमेकी पशुपालनमा आबद्ध भए पनि अहिले घटेर निकै कम भएको विकले सुनाए। छोरो नातिले आफूले गर्दै आएको पेशालाई साथ नदिएको भन्दै गाउँका धेरैले कम मात्रामा पशु पाल्ने गरेको उनको भनाइ छ। दशकौँदेखि सयौँको सङ्ख्यामा पशुपालन गर्दै आए पनि अहिलेसम्म राज्यको एक रुपैयाँ पनि अनुदान नलिएको बिकले बताए।
‘भेडाबाख्रा पाल्ने, वनजङ्गल गर्ने त टाढैको कुरा भयो, गाउँमा बस्ने मान्छे नै घट्न थालेका छन्, हाम्रो पालामा छ–सात दिन लगाएर खर्क जान्थ्यौँ, खर्कमा बर्खाको पाँच महिना उत्तिकै बिताउँथ्यौँ। रोल्पा रुकुमबाट धेरै गोठालाहरु आउँथे’, उनले सम्झिए, ‘डाँडापाखा सबै सेताम्य भेडाले ढाकिन्थे। गन्नै नसकिने हुन्थे। अहिले त गोठाला पनि कम भए। भेडाबाख्रा पनि थोरै भएका छन्, पहिलेको जस्तो खर्कहरू रमाइलो छैनन्। घाँसपातको पीर पनि हुँदैन।’
तमानखोलाका रनबहादुर र ढोरपाटनका बुधबहादुर जस्ता थुप्रै गोठाला अहिले नयाँ पुस्ताले परम्परागत पेसा नअँगालेकोमा निराश छन्। खर्क र उराठिलो बनेका बुकीले पशुचौपायाालाई कुरिरहेका छन्। तर अब तिनीहरुको पर्खाइ पर्खाइमै सीमित हुने निश्चित जस्तो बनेको छ। किनकि नयाँ पुस्ता बुकीमा पुगेर भेडा चराउनुको साटो विदेश पुगेर अनेक काम गर्न तयार छन्। भेटेरिनरी अस्पताल तथा पशु सेवाविज्ञ केन्द्र बागलुङले किसानलाई पशुपालनमाआकर्षण गर्न विभिन्न कार्यक्रम ल्याइरहेको छ। त्यस्ता कार्यक्रमले दूरदराजका किसानलाई भने छोएको छैन।
भेटेरिनरी अस्पताल तथा पशु सेवाविज्ञ केन्द्र बागलुङका प्रमुख डा ऋषिराम सापकोटाले किसानको उत्पादनले उचित मूल्य नपाउने समस्याले गर्दा पशुपालन गर्नेको सङ्ख्या घटेको बताए। केन्द्रले घाँस उत्पादन, दूध उत्पादन गर्ने किसानलाई अनुदान दिने, भेडाबाख्रा पालन गर्ने किसानलाई लक्षित गरी घाँस उत्पादन बढाउनाका साथै रोगको समस्याबाट पशुचौपाया बचाउन खोप कार्यक्रमलाई जोड दिएको उनको भनाइ छ।
‘पशुपालन गर्ने किसानको सङ्ख्या घट्दै गएको छ, खासगरी विदेश जाने ट्रेनले गर्दा घटेको हो, हामीहरुले किसानलाई प्रोहोत्सान गर्ने कार्यक्रम गरिरहेका छौँ, सानो कार्यक्रम पालिकाबाट गर्ने, ठूलो जिल्लाले गर्ने गरी योजना पनि बनाएका छौँ। नश्ल सुधार गर्ने कार्यक्रमलाई पनि जोड दिएका छौँ’, उनले भने,‘हाम्रो मुख्य प्राथमिकता रोग नियन्त्रण गर्नु हो, किसानले दुःख गरेर पशुचौपाया पाल्छन्। समय–समयमा रोगले गर्दा मर्छन् र ठूलो क्षति हुन्छ, त्यसलाई रोक्न खोप प्रभावकारी हुने हुँदा त्यसतर्फ जोड दिएका छौँ।’
बागलुङमा हाल एक लाख ५० हजार भेडाबाख्रा, एक लाख १० हजार गाई, २४ हजार भैँसी, १० हजार बङ्गुरलगायत पशुचौपायाा रहेको प्रमुख डा. सापकोटाले जानकारी दिए। अहिले जिल्लाको १० पालिकामा विभिन्न रोगविरुद्ध खोप लगाउने अभियान शुरु भएको भन्दै गाउँगाउँमा पशु प्राधिकि खटाएको उनले बताए।
तपाईंको ईमेल गोप्य राखिनेछ ।