काठमाडौँ : विश्वको सर्वोच्च शिखर सगरमाथाको नाम अङ्ग्रेजीमा पनि ‘SAGARMATHA’ नै राख्न सरोकारवाला विज्ञहरुले सुझाव दिएका छन्। सगरमाथालाई अङ्ग्रेजीमा ‘माउन्ट एभरेष्ट’ भनिने गरिएकोमा विज्ञहरुले सो सुझाव दिएका हुन्।
इतिहास शिरोमणि बाबुराम आचार्य स्मृति प्रतिष्ठानले आज (आइतवार) यहाँ आयोजना गरेको सञ्चारकर्मीसँगको अन्तरक्रियामा उनीहरुले नेपालका अन्य हिमालको नाम नेपाली मात्र रहेको जस्तै सगरमाथाको नाम पनि एउटै हुनुपर्ने तर्क गरे।
कार्यक्रममा प्रतिष्ठानका अध्यक्ष एवं इतिहासविद् प्राडा त्रिरत्न मानन्धरले इतिहास शिरोमणि आचार्यले सगरमाथाको नाम चिनाएको ऐतिहासिक तथ्यबारे जानकारी गराएका थिए।
इतिहास शिरोमणि आचार्यले सर्वप्रथम विसं १९९५ मा लेखमार्फत सर्वोच्च शिखरको नाम सगरमाथा हो भनी उल्लेख गरेका थिए।
प्राडा मानन्धरले भने, “सगरमाथाको नाम अङ्ग्रेजीमा पनि सगरमाथा नै उल्लेख गर्दा शुरुमा केही अफ्ठ्यारो हुने अवस्था आएमा सगरमाथासँगै कोष्ठभित्र ‘माउन्ट एभरेष्ट’ राख्न सकिन्छ तर मौलिक नाम सगरमाथा भने छुटाउनु हुँदैन।”
यससम्बन्धमा निकट भविष्यमै सरकारलाई ज्ञापनपत्र बुझाएर सुझाव दिने उनले बताए।
प्रतिष्ठानका महासचिव बाबुराम आचार्य, कोषाध्यक्ष कञ्चन शर्मालगायतले इतिहास शिरोमणि आचार्यले नेपालको इतिहास र सगरमाथाको मौलिक पहिचानमा गरेको योगदानबारे चर्चा गरेका थिए।
तपाईंको ईमेल गोप्य राखिनेछ ।